Atividade iha Merkadu Manleuana. Imajen/UNICEF Timor-Leste

DILI, 04 maiu 2020 (TATOLI) – Negosiante Merkadu Manleuana barak maka ladún kumpre regra ne’ebé estabelese husi Autoridade Munisípiu Dili katak negosiante hotu tenke fa’an iha merkadu laran maibé negosiante barak maka fa’an sasán to’o estrada klaran.

Adjuntu Prezidente Autoridade Munisípiu Dili, José Smith rekoñese sempre mosu irregularidade iha merkadu no dalaruma negosiante sira la fa’an sasán merkadoria iha laran maibé okupa fali espasu públiku hodi taka dalan ba ema la’o ba mai.

“Loos, sempre mosu irregularidade iha merkadu laran no dalaruma negosiante ladún kumpre desizaun sira hodi fa’an mai estrada klaran. ida-ne’e kondisaun tanba ita-nia merkadu ema hotu mai buka moris iha ne’e. Tanba ne’e ita presiza tempu atu regula sira liuhosi esforsu servisu maka’as nafatin atubele orienta ita-nia vendedór nune’e sira bele iha konsiénsia nafatin tuir orintasaun ne’ebé ita iha”, dehan José Smith iha Merkadu Manleuana, segunda ne’e.

Nia adianta, maski problema iha negosiante mosu maibé parte Munisípiu Dili sei la para hodi fó hanoin ba vendedór nune’e sira bele kumpre nafatin regra ne’ebé iha.

“Ami orienta ona ba Xefe Jestaun Merkadu Manleuana atu haree kestaun ne’e hodi ita-nia vendedór labele fa’an to’o mai estrada klaran no tenke dook husi estrada. Parte Autoridade Munisípiu Dili kontinua sensibiliza no fanun sira nia konsiénsia nune’e sira bele komprende didi’ak”, nia akresenta.

Tuir Adjuntu Prezidente Autoridade Munisípiu Dili, irregularidade ne’e akontese dalabarak iha merkadu sira aleinde Merkadu Manleuana.

“Ita labele konsensializa sira ohin no aban sira halo tuir kedan maibé tenke presiza tempu, espera sira iha konsiénsia rasik hodi kumpre”, nia akresenta.

Sorin seluk, Xefe Jestaun Merkadu Manleuana, Julio Barros, informa katak maluk negosiante sira ne’ebé maka fa’an iha estrada ne’e maihusi negosiante iha Elemloi no Comoro nian ne’ebé maka foin muda mai.

“Bainhira iha situasaun Estadu Emerjénsia no COVID-19 ne’e ha’u iha ona planu atu haruka sira fa’an iha laran tanba iha laran fatin mamuk sei barak no husi fatin ne’e ema halo movimentu ba mai”, nia salienta.

Jornalista: Natalino Costa
Editora: Julia Chatarina

HAKEREK NO HATÁN

Please enter your comment!
Please enter your name here