MS hamutuk ho Ekipa Autoridade Munisípiu Dili inklui Jestór Merkadu tun ba Merkadu Manleuana hodi sensibiliza distansiamentu fíziku ba negosiante merkadu inklui kompradór. Imajen Tatoli/Eugénio Pereira

DILI, 04 maiu 2020 (TATOLI) – Diretora Saúde Munisípiu Dili, Agostinha Sagurado, rekoñese difísil atu muda ema ninia mentalidade atubele koopera kombate surtu COVID-19 maibé parte Ministériu Saúde (MS) sei kontinua sensibiliza kona-ba distansiamentu fíziku, nune’e sidadaun hotu bele hadook-an husi vírus ne’e.

“Difísil tebes ita atu muda ema ninia hahalok tanba ne’e maka Ministériu Saúde iha dezafíu boot ida, liu-liu iha servisu Saúde Munisípiu Dili atu haree oinsá bele eduka ita-nia maluk sira atu bele kumpre regra distansiamentu sosiál no fíziku, maibé ami nia estratejia maka kontinua halo sosializasaun ba iha fatin públiku no mós husi aldeia ba suku”, dehan Diretora ne’e hafoin ramata sensibiliza negosiante sira iha Merkadu Manleuna, segunda ne’e.

Maski nune’e, Saúde Munisípiu Dili iha ninia planu rasik atu mantein distánsia fíziku no hahú uza fasilidade ne’ebé maka oferese husi parseiru sira.

“Ita tenke halo monitorizasaun filafali no atividade monitorizasaun ne’e bele sai  edukasaun sívika ida ba ita-nia komunidade no ida-ne’e ami sei sosializa nafatin ba merkadu sira hotu hanesan Taibesi, Tasi-Tolu, Manleu no  Becora, inklui fatin seluk”, Agostinha Sagurado salienta.

Tuir Diretora ne’e, Saúde Munisípiu Dili no Autoridade Munisípiu Dili, hamutuk ho Prezidente Autoridade rasik iha ona hanoin ida katak fatin públiku no mós merkadu sira ne’ebé maka loke lorokraik, ekipa tenke tuun hela dei’t tanba hanesan oras ne’ebé komunidade sira halibur-an ho intervensaun sira ne’e bele eduka komunidade  labele halibur malu iha situasaun sira relasiona ho COVID-19.

“Ida-ne’e atubele garantia edukasaun no  sosializasaun hodi bele fó hanoin bebeik atu sira sente katak ita-nia esforsu fó sai informasaun ba sira hodi kuidadu-an rasik iha prevensaun COVID-19”, nia akresenta.

Nune’e, Dirijente ne’e husu ba parte hotu ne’ebé maka Governu fó fiar nu’udar ekipa ba kombate moras COVID-19 rasik, labele sente kolen nune’e bele halo kualkér forma hamutuk kombate vírus ne’e iha komunidade.

“Ita labele sente dehan kolen maibé ita esforsu nafatin liuhosi atividade ida-ne’e maka Saúde Munisípiu Dili prioritiza atu hadook ita-nia komunidade husi moras COVID-19”, nia realsa.

Iha fatin hanesan, Adjuntu Prezidente Autoridade Munisípiu Dili, José Smith, hateten ekipa téknika prevensaun Autoridade Munisípiu Dili ne’ebé kompostu husi Servisu Saúde Munisípiu Dili  hamutuk ho parseiru balun hanesan Fundu Organizaun Nasaun Unida ba Labarik (UNICEF, sigla inglés) no Organizasaun Mundiál ba Ai-han (WFP, sigla inglés) kontinua mai iha Merkadu Manleuana hodi fó sosializasaun ba negosiante sira hodi komprende no mantein disiplina distansiamentu fízika.

“Husu nafatin ba sira atu hatoman-an fase liman bebeik no kontinua hatoman-an uza máskara bainhira fa’an sasán. Tanba iha merkadu ne’e fatin públika demais ne’ebé konsentra ema barak no ita haree katak iha duni difikuldade ba prevensaun ba distansiamentu sosiál no distansiamentu fíziku”, nia subliña.

Maski nune’e, José Smith, dehan sei kontinua nafatin atu sensibiliza negosiante sira tanba ida-ne’e hanesan devér atu fó nafatin atensaun ba vendedór sira atu halo prevensaun.

Adjuntu Prezidente Munisípiu Dili apela mós ba kompradór bainhira hola sasán tenke uza máskara no mantein distansiamentu fíziku.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here