Mikrolete iha Kapitál Dili. Imajen Tatoli/António Gonçalves

DILI, 04 maiu 2020 (TATOLI) – Relasiona ho estensaun períodu Estadu Emerjénsia, Governu daudaun ne’e aprova ona medida ne’ebé iha alterasaun iha parte balun, hanesan iha fleksibilidade ba movimentasaun transporte públiku maibé tenke kumpre medida ne’ebé Governu estabelese ona.

Tuir Ministru Reforma Lejizlativa no Asuntu Parlamentár, Fidelis Manuel Leite Magalhães, razaun Governu fó fleksibilidade ba movimentasaun transporte públiku iha Estadu Emerjénsia faze daruak ne’e tanba simu informasaun katak moras COVID-19 iha Timor-Leste la aumenta ho númeru boot.

“Regra ba transporte públiku nian, imposível ita-nia vida tomak atu bandu movimentasaun transporte públiku, entaun ita tenke halo espasu neneik atu asegura nafatin maibé regra sira ne’e ita tenke respeita. Ho ida-ne’e konklui katak hafoin ami simu espesialista sira nia informasaun katak ita-nia númeru ema moras kada loron ne’e la aumenta boot maibé númeru ema rekuperadu maka boot. Entaun ida-ne’e oportunidade mai Governu atu halo fleksibilidade maibé tenke kontinua nafatin implementa medida sira ne’ebé maka bele prevene moras atu labele hada’et”, dehan Ministru Fidelis iha Salaun Ministériu Finansa, Aitarak-Laran, segunda ne’e.

Notísia Relevante: KM Aprova Ona Medida Ezekusaun Estensaun Estadu Emerjénsia

Tuir governante ne’e, implementasaun Estadu Emerjénsia ho objetivu atu taka fronteira sira, nunee bele izola vírus hodi labele alastra ba ema seluk.

Aleinde ne’e, objetivu prinsipál husi Estadu Emerjénsia maka fó biban ba Governu hodi hasa’e kapasidade iha rai-laran atu hadi’a sistema kuarentena no fasilidade saúde nian hanesan laboratóriu nasionál.

Ba kestaun COVID-19, Fidelis salienta, Governu prepara ona kapasidade rai-laran no hola medida sira atu populasaun halo toman-an ho medida sira ne’ebé sei sai prátika baibain iha moris ba oin hanesan distansiamentu sosiál.

Antes ne’e, Prezidente Repúblika Francisco Guterres ‘Lú Olo’ dekreta Estadu Emerjénsia faze dahuluk no hahú entra ein vigór iha loron sábadu, 28 marsu hahú husi oras 00:00  to’o 26 abríl 2020 oras 23:59, kalan fahe rua (meia-noite) Timor-Leste tama ona iha Estadu Emerjénsia atu fó dalan ba Governu implementa médida espesífiku sira hodi prevene propagasaun COVID-19.

Haree ba nesesidade atu estende, Xefe Estadu promulga estensaun Estadu Emerjénsia períodu daruak ho durasaun loron-30, hahú husi 28 abríl oras 00.00 to’o 27 maiu 2020 oras 23:59.

Nune’e, Governu liuhosi reuniaun Konsellu Ministru aprova Dekretu Governu ba ezekusaun medida Estadu Emerjénsia foun.

Dekretu Governu númeru 3/2020, 29 marsu mantein nafatin proibisaun ba entrada estranjeiru iha territóriu nasionál, maibé eseptu ba estranjeiru ne’ebé presta atividade profisionál iha setór petrolíferu.

Dekretu Governu ne’e mós fó dalan ba atividade transporte públiku sira, maibé ho kondisaun hanesan veíkulu sira tenke fase no hamós loron-loron iha karreta laran antes hahú atividade no mós motorista, tripulasaun no pasajeiru sira tenke uza máskara protesaun no evita kualkér kontaktu fíziku.

Antes ne’e, iha medida Estadu Emerjénsia faze dahuluk laiha movimentasaun ba transporte públiku.

Entretantu, hafoin Timor-Leste rejista kazu pozitivu COVID-19 dahuluk iha 21 marsu 2020, kazu pozitivu ikus liu rejista iha 24 abríl ho totál konfirmadu na’in-24, enkuantu pasiente rekuperadu to’o ohin loron hamutuk na’in-20 (16 pozitivu no 4 provável) no pasiente ne’ebé sei baixa iha fatin izolamentu Vera Cruz hamutuk na’in-ualu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here