Prezidente Komisaun Funsaun Públika, Faustino Cardoso Gomes. Imajen Tatoli/Egas Cristovão

DILI, 04 maiu 2020 (TATOLI) – Prezidente Komisaun Funsaun Públiku (KFP), Faustino Cardoso Gomes, informa nia parte mai hasoru Primeiru-Ministru (PM), Taur Matan Ruak, hodi relata kona-ba ninia mandatu inklui Komisáriu na’in-lima ne’ebé maka sei termina iha fulan-maiu tinan ne’e.

Prezidente no Komisáriu KFP na’in-lima simu pose iha loron 30 maiu 2015, nune’e mandatu ne’e sei termina iha loron 28 maiu 2020 no loron tuir mai tenke simu pose iha 29 maiu,  tanba ne’e nia husu ba Governu no Parlamentu Nasionál atu halo diskusaun kona-ba kontinuidade hodi labele husik mamuk bainhira termina mandatu ida-ne’e.

“Komisaun haruka ona karta mai Primeiru-Ministru, agora kabe ba Governu maka sei haree oinsá atu ba oin, nune’e mós komisaun haruka karta ona ba iha Parlamentu Nasionál atu tetu no haree ba oin kona-ba lideransa ba mandatu Prezidente no Komisáriu Komisaun Funsaun Públika foun ne’e atu halo diskusaun”, dehan Prezidente KFP hafoin ramata enkontru ho PM Taur iha Palásiu Governu, segunda ne’e.

Tuir Faustino katak, Komisáriu KFP na’in-tolu noamea direita husi Governu no na’in-rua seluk nomeia husi Parlamentu  Nasionál.

“Ohin Primeiru-Ministru bolu ha’u mai atu ko’alia kona-ba mandatu hodi haree ba oin atu labele iha vakum bainhira iha tranzisaun mandatu ida ba iha mandatu seluk”, nia akresenta.

Nia salienta, presiza tau atensaun ba kestaun ne’e no presiza aselera prosesu tanba ligadu ba funsionamentu institusaun nian.

Komisáriu KFP na’in-lima maka Maria Domingas Alves, Jacinta Bernardo, Maria Olandina Caeiro Alves (troka ba António Freitas) no José Telo Soares Cristovão.

KFP harii iha tinan 2009 no estabelese atu reforsa kapasidade Administrasaun Públika nian no garante katak setór públiku bazeia ba méritu no tuir modelu profisionál ne’ebé aas atubele fó ba povu servisu ne’ebé iha kualidade, efisiente, hodi garante jestaun dezempeñu ne’ebé ekonómika no efetiva.

Komisaun ne’e mós jere Sistema Informasaun no Jestaun Pesoál nian (PMIS), iha baze-dadus ida ne’ebé importante ho informasaun pesoál no profisionál ba funsionáriu públiku sira hotu ho loloos.

Daudaun ne’e totál númeru funsionáriu públiku sira nian maka besik 32.000.

Dezde tempu VI Governu Konstitusionál, hahú hapara rekrutamentu funsionáriu permanente sira nian no hahú ona haree fila fali kuadru jurídiku, tama mós Lei Funsaun Públika no Estatutu Funsaun Públika nian, hamutuk ho KFP no dirijente sira área Rekursu Umanu sira nian.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here