Vise Prezidente Komisaun A ne'ebé trata asuntu Konstituisaun no Justisa, Francisco de Vasconcelos. Imajen/ Egas Cristovao

DILI, 04 maiu 2020 (TATOLI)—Vise-Xefe Bankada Partidu Libertasaun Populár (PLP), Francisco Vanconcelos hateten, laiha ajenda ruma ba plenária Parlamentu Nasionál ne’e hatudu sinál ladi’ak.

“Ha’u haree ohin mós plenária laiha ajenda entaun sinál ladi’ak. Ajenda iha semana kotuk iha maibé Prezidente Parlamentu Nasionál kansela ajenda ba plenária ne’e,” dehan Vise-Xefe Bankada PLP, Francisco de Vasconcelos, ba jornalista sira iha Parlamentu Nasionál, segunda ne’e.

Entretantu, Vise-Xefe Bankada CNRT, Patrocínio dos Reis Fernandes hateten, ajenda ba plenária ne’e desizaun líder bankada nian.

Tanba, tuir nia, bainhira ohin iha ajenda entaun semana kotuk líder bankada sira aprova ona ajenda, tanba ne’e mak ohin laiha plenária.

“Laiha plenária la fó impaktu ba funsionamentu Parlamentu nian, tanba ajenda antes ne’e mak estensaun Estadu Emerjénsia ne’e. Pozisaun CNRT nian kontra tanba CNRT hakarak funsionamentu instituisaun estadu sira-ne’e la’o nafatin maibé saida mak akontese tanba maioria deside estensaun Estadu Emerjénsia. Estadu Emerjénsia ita ba sulan povu sira depois ita serbisu para manán osan,” dehan Vise-Xefe Bankada CNRT ne’e.

Bainbain Prezidente Parlamentu Nasionál, Arão Noé de Jesus da Costa Amaral hateten bainhira laiha ajenda signifika laiha plenária tanba ajenda hotu-hotu tenke aprova liuhosi reuniaun líder bankada sira.

Rejimentu Parlamentu Nasionál artigu 17.º (Kompeténsia Prezidente Parlamentu Nasionál) alínea 1- prezide meza, alínea b  marka sesaun plenária no fixa  Ordem do Dia (ajenda) hafoin rona reprezentante bankada parlamentár sira liuhosi Konferénsia Reprezentante Bankada Parlamentár sira no aprezenta ba plenária hodi halo diskusaun.

Purtantu artigu 22.º (Kompeténsia Vise-Prezidente sira), alínea 1 hateten vise-prezidente sira, rotativamente, substitui prezidente bainhira falta.

Alíena 2 hosi artigu ne’e hateten, vise-prezidente sira asume responsabilidade ne’ebé solisita hosi Prezidente Parlamentu Nasionál.

Alínea 3 hosi artigu ne’e mós esplika, vise-prezidente sira asume responsabilidade hala’o funsaun reprezenta Parlamentu, bazeia ba delegasaun kompeténsia hosi Prezidente Parlamentu Nasionál.

Jornalista : Evaristo Soares Martins

Editór        : Cancio Ximenes

1 KOMENTÁRIU

  1. Diak liu plenaria refere tenki submete sistematikamente
    Tuir sequencia de assunto por exemlplo assumto agora importante mak EE (Estado emergençia).
    Signifika Deputado sira tengki iha konsiderasaun ba assunto refere.
    Karik iha asunto escondido diak liu haluhan tia; tamba povo agora sei konsidera hela Dekrito Presidente nia kona ba EE ;nia data final bele to’o dia 28 de Maio; Mak bele hatama fali assunto seluk.

HAKEREK NO HATÁN

Please enter your comment!
Please enter your name here