Xefe Departementu Jestaun Merkadu Taibesi, Anibal de Jesus. Foto/Natalino Costa.

DILI, 04 abril 2020 (TATOLI)–Xefe Jestór Merkadu Taibesi, Anibal de Jesus hateten, maski movimentu ema daudaun ne’e la’o normál hodi tama-sai Merkadu Taibesi maibé jestór merkadu nafatin asegura distansiamentu sosiál no fíziku ba vendedór no kompradór sira ne’ebé hala’o atividade faan no sosa sasán.

“Ami Jestór Merkadu Taibese aplika nafatin distansiamentu sosiál no fíziku ba vendedór no kompradór sira. Sira tenke fase liman beibeik no tenke uza máskara bainhira tama-sai merkadu,” dehan Xefe Jestór Merkadu Taibesi, Anibal de Jesus, ba Ajénsia TATOLI iha nia knaar fatin Taibesi, Dili, segunda ne’e.

Nia dehan iha vendedór balun ne’ebé mak la kumpre regra prevensaun COVID-19 maibé parte seguransa kontinua firme (tegas) hodi mantein regra ne’ebé Estadu dekreta ona.

“Ami firme (tegas) nafatin ba sira hodi kumpre regra. Maibé sira mak kontinua la tuir maka ami sei taka fatin no sira-nia sasán no sei lafaan iha ne’e. Ami avizu hela de’it ba sira maibé ita Timor susar atu komprende. Agora iha fulan ida nia-laran ne’e mak ko’alia la rona mak fatin ne’e sei taka ba sira,” nia subliña.

Tuir Xefe Jestór Merkadu Taibese, Anibal de Jesus afirma, salurik ne’ebé monta iha Merkadu Taibese ne’e la to’o ba vendedór sira maibé parte seguransa ho meiu ida koloka vendedór balun ne’ebé la hetan salurik koloka fali ba balkaun mamuk ne’ebé ema la uza.

“Salurik 50 ne’ebé Ministériu Saùde no Autoridade munisipál monta la to’o ba ita-nia vendedór sira maibé ami haree fali balkaun mamuk hodi destaka sira iha ne’ebá hodi faan sira-nia sasán,” nia dehan.

Durante ne’e, ekipa Jestór Merkadu Taibesi rejistu vendedór permanente hamutuk 920 ona maibé la inklui ho vendedór 50 ikus ne’ebé daudaun ne’e utiliza ona salurik ne’ebé Governu monta tiha ona.

“Ita-nia vendedór permanente iha merkadu Taibese hamutuk 920 ne’e sira faan iha laran de’it. Maibé sira ne’ebé faan iha liur ne’e la inklui ba permanente tanba sira ne’e hanesan faan movél de’it ne’ebé bainhira faan hotu sira fila kedan,” nia hateten.

Entretantu, nia informa, maski ekipa seguransa ba Merkadu Taibesi agora daudaun ne’e iha ema na’in 13iInklui ho Xefe Jestór Merkadu maibé sira kontinua esforsu nafatin hala’o servisu hodi haree ba vendedór no kompradór sira maske sempre enfrenta defikuldade oioin.

“Maski ami-nia ekipa seguransa Merkadu Taibesi natón de’it maibé ita sempre esforsu nafatin hodi serbisu no haree ba ita-nia vendedór no kompradór sira. Ita enfrenta defikuldade iha merkadu tanba ema barak satán movimentu normál. Ita ko’alia beibeik no avizu hela de’it no dalaruma balu laiha duni konsiénsia maibé iha maioria mak halo tuir regra ne’ebé ita anúnsia ba sira. Bainhira sira la rona, ba ami hanesan baibain ona tanba serbisu iha merkadu mak nune’e ona,” dehan Xefe Jestór Merkadu Taibesi ne’e.

Atu hafasil halo kontrolu ba vendedór no kompradór sira, nia dehan, ekipa seguransa iha Merkadu Taibese halo serbisu rotasaun balu tama dadeer no balu tama iha tempu lorokraik.

“Normalmente iha merkadu Taibesi ami halo serbisu rotasaun no fahe ba grupu rua no kada grupu iha na’in neen (6). Ekipa primeiru hahú husi tuku 08:00-14:00 no ekipa segundu hahú 14:00-19:00 kalan,” nia dehan.

Kona ba ekipamentu protesaun COVID-19 ba membru seguransa sira, nia informa, ekipa seguransa merkadu prepara rasik maibé iha fulan kotuk liubá partikularmente iha Organizasaun Naun Governmental (NGO) balu iha Timor-Leste mak fó apoiu.

“Ami agora buka rasik mak foin uza. Maibé uluk liubá ami hetan apoiu husi partikularmente iha Organizasaun Naun governmentál balu mak apoiu. Maibé ba ami laiha kestaun ba ekipamentu protesaun,” nia hateten.

Notísia Relevante: Governu Monta Salurik 50 ba Negosiante Taibesi

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here