Prezidente Komisaun Funsaun Públika, Faustino Cardoso Gomes. Imajen Tatoli/Egas Cristovão

DILI, 04 maiu 2020 (TATOLI) – Prezidente Komisaun Funsaun Públika (KFP), Faustino Cardoso Gomes, konfirma nia parte hato’o ona ninia prontidaun hodi okupa iha estrutura Governu foun bainhira hetan fiar husi Líder Ezekutivu.

Iha loron 30 abríl, Primeiru-Ministru (PM), Taur Matan Ruak, halo enkontru semanál ho Prezidente Repúblika, Francisco Guterres ‘Lú Olo’,  aprezenta lista membru Governu na’in-neen hodi kompleta estrutura VIII Governu Konstitusionál.

Lista ne’ebé Xefe Governu aprezenta ba Xefe Estadu mak hanesan, Ministru Antigu Kombatente no Libertasaun Nasionál, Meta Malik, Ministra Saúde, Odete Maria Freitas Belo, Vise-Ministra Turizmu Komérsiu Indústria, Inácia Texeira, Ministru Administrasaun Estatál, Faustino Cardoso, Ministru Komérsiu Indústria no Turizmu, Manuel Vong no Ministru Finansa, Fernando Hanjam.

“Loos ha’u-nia naran tama lista membru Governu. Maibé husik ba Prezidente Repúblika ninia kompeténsia atu haree hodi ikus mai halo nomeasaun”, dehan Prezidente KFP hafoin ramata enkontru ho PM Taur iha Palásiu Governu, segunda ne’e.

Notísia Relevante: Taur Sei Aprezenta Lista Membru Governu Foun ba PR

Nia adianta, maski nia naran tama iha lista iha estrutura membru Governu ne’ebé maka PM Taur temi ona, maibé nia parte seidauk bele ko’alia detalladamente saida maka nia sei halo bainhira asume kargu nu’udar membru Governu tanba daudaun sei foka liubá servisu KFP nian liga ba prosesu hand over ne’ebé sei akontese iha tempu badak.

“Ha’u  seidauk bele ko’alia kona-ba saida maka ha’u atu halo bainhira asume kargu foun. Ha’u sei foka maka iha mandatu Komisaun Funsaun Públika, ne’ebé ita foka lai ida-ne’e”, dehan  Faustino Cardoso.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here