Imajen Tatoli/dok.

DILI, 4 maiu 2020 (TATOLI)—Adjuntu Sekretáriu Jerál Partidu CNRT, Jacinto Rigoberto Gomes de Deus hateten, Partidu Congresso Nacional da Reconstrução de Timor (CNRT) fó hanoin ba Partidu Kmanek Haburas Unidade Nasionál Timor Oan, atu halo konferénsia ka kongresu estraordinária hodi sai hosi koligasaun foun ho naran Aliansa Maioria Parlamentár (AMP).

“Partidu CNRT hakarak fó hanoin ba partidu KHUNTO kona-ba nesesidade atu halo fali Kongresu ka Konferénsia ida hodi deklara katak Rezolusaun atu asosia ba Koligasaun AMP foun la vale ona. Ne’e hotu atu evita de’it katak iha loron ikus mai partidu ida bele reklara katak Rezolusaun ne’ebé sai iha Kongresu KHUNTO nian, hosi loron 6 to’o 8 fulan-marsu, se vale nafatin ka ‘sei kesi’ hela partidu sira”, Adjuntu Sekretáriu Jerál, Jacinto Rigoberto Gomes de Deus, informa liuhosi komunikadu imprensa ne’ebé Agência TATOLI asesu iha sede Partidu CNRT, Bairro dos Grilhos, Dili, segunda ne’e.

Nia haktuir, iha loron 1 fulan-maiu 2020, Komisaun Polítika Nasionál Partidu CNRT realiza reuniaun hodi haree ba dezenvolvimentu polítiku iha rai-laran no nasai rezolusaun tuir mai kona-ba karta hosi Partidu KHUNTO nian

Jacinto Rigoberto. Imajen/TATOLI.

Iha loron 29 abríl 2020, nia informa, partidu CNRT simu karta hosi Prezidente Partidu KHUNTO, hodi komunika katak partidu KHUNTO sai ona hosi koligasaun Aliansa Maioria Parlamentár (AMP) foun, atu hola parte nafatin iha Governu, to’o 2023.

“Partidu CNRT respeita desizaun hosi Partidu KHUNTO atu sai hosi koligasaun,” dehan Adjuntu Sekretáriu Jerál Partidu CNRT, Jacinto Rigoberto Gomes de Deus.

Partidu CNRT, nia esplika, hakarak fó hanoin de’it katak iha audiénsia Prezidente-Repúblika, iha loron 6 marsu 2020, Xefe Estadu hatudu Lei Partidu Polítiku ne’ebé ezije katak asosiasaun ba koligasaun hosi partidu tenke hetan aprovasaun hosi Kongresu ka Konferénsia partidu nian kona-ba ámbitu asosiasaun ne’e.

Ho ida-ne’e, nia dehan, mak partidu KHUNTO iha nia kongresu, iha kedas iha loron 6 marsu, hasai rezolusaun hodi aprova KHUNTO tama iha koligasaun foun AMP.

Notísia Relevante: KHUNTO Sei Realiza Konferénsia Estraordinária Hodi Deklara Sai hosi AMP

Jornalista : Evaristo Soares Martins

Editór      : Cancio Xiemenes

HAKEREK NO HATÁN

Please enter your comment!
Please enter your name here