Karreta Klínika móvel husi Autoridade RAEOA. Imajen/Mídia RAEOA

DILI, 04 maiu 2020 (TATOLI) – Autoridade Rejiaun Administrativa Espesiál Oé-cusse Ambeno (RAEOA) apoiu unidade móvel saúdeba Sentru Integradu jestaun Krize (CIGC, sigla portugés), hodi  haforsa fatin izolamentu iha Vera Cruz, nune’e bele fasilita tratamentu ba pasiente COVID-19.

Prezidente Autoridade RAEOA, José Luís Guterres ‘Lugu’, hateten apoiu ne’ebé parte RAEOA fó ba CIGC bazeia ba pedidu Primeiru-Ministru, Taur Matan Ruak.

“Ami mai hanesan kumpre pedidu husi Primeiru-Ministru, ne’ebé husu atubele fó meiu ne’ebé iha Oé-cusse hodi ajuda kombate pendemia globál iha ita-nia rai”, tenik iha seremónia entrega ne’ebé halo iha Sentru Konvensaun Dili (CCD, sigla portugés), segunda ne’e.

Tanba ne’e, nia parte laran haksolok tebes ho asaun solidaridade ida-ne’e tanba povu Oé-cusse bele halo ona solidaridade ba maluk sira iha Dili hodi kombate COVID-19.

“Husi Oé-cusse ami hanesan laran solok iha oportunidade bele ajuda no hatudu solidaridade husi povu Oé-cusse Ambeno ba iha povu Timor-Leste nian no ha’u bele dehan agradese mós  ba imi (jornalista) tomak halo ona kobertura”, Lugu adianta.

Tuir Lugu, sente laran solok bele vizita maluk sira ne’ebé kombate COVID-19 iha nível nasionál no haree ba númeru pasiente Infetadu COVID-19 ne’ebé kontinua aumenta.

“Felizmente ita seidauk iha ema mate hanesan mós iha Oé-cusse seidauk iha ema mate. Ami kumpre regra ne’ebé Governu Sentrál no komunidade internasionál halo”, nia akresenta.

Sorin seluk, Koordenadór Destakamentu Reasaun Rápida CIGC, Aurélio Guterres, karreta ne’e sei uza iha fatin izolamentu Vera Crúz.

“Ita-nia ekipa, liuliu sira ne’ebé maka toma konta ba klínika bele uza sasán ne’e ho di’ak inklui motorista hotu”, nia salienta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here