Embaixadór UE ba Timor-Leste, Andrew Jacobs hamutuk ho Reprezentante Embaixadór Portugál iha Timor-Leste, Cristina Faustino, entrega simbolikamente materiál ba Prezidente TLPU, Manuel Pinto no Prezidente AJTL, Zevonia Viera. Imajen Tatoli/Joanico de Araújo

DILI, 03 maiu 2020 (TATOLI) – Iha ámbitu Loron Mundiál Liberdade Imprensa, Uniãun Europeia (UE) hamutuk ho Instituto Camões liuhosi projeitu “Osan Povu Jere ho Di’ak”, fó apoiu karregamentu pulsa telemóvel $20 ba kada ema inklui máskara hamutuk 250, ba jornalista timor-oan ne’ebé tama iha organizasaun Timor-Leste Press Union (TLPU) no Asosiasaun Jornalista Timor-Leste (AJTL).

Inisiativa ida ne’e, hodi ajuda fasilita kobertura jornalista sira ne’ebé iha liña frente hodi nafatin divulga informasaun iha situasaun surtu COVID-19 nia laran.

Apoiu hirak ne’e, entrega simbolikamente husi Embaixadór UE ba Timor-Leste, Andrew Jacobs hamutuk ho Reprezentante Embaixadór Portugál iha Timor-Leste, Cristina Faustino, ba Prezidente TLPU, Manuel Pinto no Prezidente AJTL, Zevonia Viera.

Iha diskursu, Embaixadór Andrew Jacobs, hateten nia parte sente orgullu tebes atu fó apoiu Jornalista timor-oan sira liuhosi inisiativa projetu Osan Povu Nian Jere ho Di’ak iha tempu difísil ida ne’e.

“Situasaun ekonómiku ne’ebé difísil mak rezulta husi COVID-19 signifika katak Jornalista sira ninia subsisténsia hetan ameasa boot iha tempu ida mak ita presiza liu sira. Jornalista sira presiza meiu hodi reporta ho loloos no atualizadu atu nune’e públiku bele hetan informasaun kona-ba COVID-19, oinsá atu proteje sira nia-an rasik no ema sira ne’ebé sira hadomi, no oinsá atu kombate”, dehan UE iha seremónia entrega simbolikamente ne’ebé hala’o iha Salaun Borja da Costa, Agência Tatoli, Farol, domingu ne’e.

Tuir nia, jornalizmu independente mak importante liu atu fó públiku asesu ba informasaun ne’ebé loloos no atu kontra informasaun la loos kona-ba pandemia ne’e.

Nune’e, reprezentante UE husu ba Jornalista timor-oan sira situasaun surtu COVID-19 presiza kontribui informasaun ne’ebé maka kredível hodi kontribui ba prevensaun surtu ne’e.

“Jornalista sira presiza halo relatóriu ne’ebé kredível atu kombate informasaun falsu barak mak sirkula kona-ba Coronavírus, espesialmente husi mídia sosiál. Ida-ne’e aumenta ansiedade, prekonseitu no rasizmu. Ita tenke serbisu hamutuk atu hapara ida-ne’e. Agora importante liu jornalista sira halo sira nia serbisu ho liberdade no loloos atu kontra informasaun la loos no notísia falsu atu garante sidadaun sira hetan asesu ba informasaun importante no konfiansa”, nia adianta.

Sorin seluk, Prezidente TLPU, Manuel Pinto agradese tebes ba apoiu ne’ebé maka UE no Instituto Camões apoiu ba jornalista sira.

‘’Apoiu ne’e ajuda tebes ami atu oinsá bele hala’o ami nia knaar, ami la haree ba valór maibé ami haree katak sosiadade husi Portugál no Uniaun Europeia tomak konxiente katak moras ne’e perigu tebes”, dehan Manuel Pinto.

Tuir nia, bainhira Estadu deklara Emerjénsia relasiona ho surtu COVID-19, TLPU inklui AJTL iha prinsípiu atu divulga informasaun ne’ebé eduka sosiedade.

“Ami komunga prinsípiu atu fó-sai informasaun tenke eduka no oinsá maka sosiadade ida-ne’e hatene saida maka COVID-19 no oinsá nia bele halo prevensaun atu hadook-an husi moras ne’e”, nia adianta.

Prezidente TLPU rekoñese katak informasaun ne’ebé jornalista sira oferese ba públiku seidauk bele atinje ba públiku tomak tanba jornalista bainhira fó informasaun la depende mesak ba kapasidade jornalista ninian atu fó informasaun maibé depende mós ba oportunidade ne’ebé mak iha atu fasilita sira ho materiál ne’ebé mak iha.

Nia iha esperansa katak apoiu ida ne’e la’ós to’o de’it iha ne’e maibé buka esplora mós oportunidade seluk no kria tan programa hodi kolabora malu nafatin ba oin.

“Ami hein katak tulun ne’e la to’o iha COVID-19 ne’e de’it, maibé ita sei esplora nafatin oportunidade seluk atu konsensializa, eduka ita-nia sosiedade liuliu povu Timór nu’udar sidaudaun, saida mak bele kontribui ba nasaun no dezenvolvimentu nasaun nian tanba sira mós iha devér aleinde direitu”, nia akresenta.

Nune’e mós, Prezidente AJTL, Zevonia Viera apresia tebes ba apoia ne’ebé maka Uniaun Europeia no Institutu Camões oferese.

‘’Apoia ne’e bele hakma’an jornalista sira-nia servisu iha Estadu Emerjénsia no ba surtu COVID-19”, nia subliña.

Biban ne’e, Prezidente AJTL husu ba jornalista sira hodi kontinua kaer nafatin prinsípiu jornalizmu nian katak devér maka ajuda populasaun atu sira hatene katak saida maka Coronavírus no oinsá sira bele prevene-an husi moras ida-ne’e, inklui halo tuir medida ne’ebé fó sai husi Ministésiu Saúde no mós Organizasaun Mundiál Saúde.

Nia mós apela ba jornalista sira atu haree didi’ak notísia antes atu públika, nune’e bele kontribui  ba informasaun ne’ebé kredível.

Jornaalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here