Primeiru-Ministru, Taur Matan Ruak, kinta (02/5), hato’o felisitasaun ba jornalista timor-oan no mós jornalista hotu iha mundu tomak ba loron mundiál liberdade imprensa ne'ebé selebra iha loron 3 maiu, kada tinan. Imajen/GPM

DILI, 03 maiu 2020 (TATOLI) – Relasiona ho Loron Mundiál Liberdade Imprensa, Primeiru-Ministru (PM), Taur Matan Ruak, felisita Jornalista hotu, espesiál liu ba Jornalista timor-oan sira ne’ebé hala’o kna’ar ho profisionál maski dalabarak hasoru difikuldade iha terrenu.

“Xefe Governu sente kontente ho serbisu Jornalista sira nian iha Timor-Leste, ne’ebé divulga informasaun sira ba ita-nia komunidade ho responsabilidade no tuir duni Kódigu Étika Jornalista sira nian, embora hasoru difikuldade tanba sei falta tebes rekursu umanu”, refere nota imprensa ne’ebé Agência Tatoli asesu domingu ne’e.

Tuir Xefe Governu, liuhosi Sekretaria Estadu Komunikasaun Sosiál (SECOMS) no organizasaun mídia sira-nian, Governu hakarak kontinua hasa’e kapasidade Jornalista sira nian iha área jurnalizmu no insentiva instituisaun mídia sira atu iha kbiit hodi kontribui di’ak liután ba prosesu konstrusaun Estadu no demokrasia iha rai-laran liuhosi informasaun, tanba mídia nu’udar pilár importante.

Liuhosi biban ida ne’e, PM Taur konvida Jornalista sira hodi nafatin serví povu ho informasaun ne’ebé imparsiál.

“Mai ita hamutuk hodi luta nafatin ba prezerva bem-estar povu nian liuhosi servisu Jornalista ne’ebé sempre sai lalenok ba ema hotu”, afirma Xefe Ezekutivu.

Maski Timor-Leste nasaun joven ho idade menus 20, iha lista índise ba liberdade imprensa mundiál iha saltu bo’ot ida tan ne’ebé iha tinan kotuk iha pozisaun 84, enkuantu tinan ne’e sa’e ba 78.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here