Portavóz Gabinete Sentru Integradu Jestaun Krize (CIGC), Sérgio Lobo. Imajen Tatoli/Egas Cristovão

DILI, 03 maiu 2020 (TATOLI) – Sentru Integradu Jestaun Krize (CIGC, sigla portugés) liuhosi Sala Situasaun, informa pasiente COVID-19 rekuperadu iha Timor-Leste mantein na’in-20, hafoin orseik pasiente rekuperadu na’in-sanulu maka foin sai husi sala izolamentu Vera Cruz.

“Kazu konfirmadu kontinua 24, kazu rekuperadu mantein 20, inklui profesór iha Liquiçá na’in-rua ne’ebé fila ona, no provável na’in-haat. Agora kazu konfirmadu iha Vera Cruz hela na’in-ualu de’it”, dehan Portavóz CIGC, Sérgio Lobo, liuhosi konferénsia imprensa iha Sala Sentru Mídia COVID-19, iha Sentru Konvensaun Dili, (CCD, sigla portugés), domingu ne’e.

Kazu negativu aumenta hamutuk 533, kompara ho orseik 501.

“Negativu foun maihusi kuarentena iha Otél Novo Horizonte hamutuk 28 no husi Liquiçá husi vijilánsia sintinela nian hamutuk na’in-haat maka negativu tan. Enkuantu restu sei hein hela rezultadu”, nia akresenta.

Ba loron ohin, eis Ministru Saúde ne’e esplika, kazu foun no provável laiha, maibé totál ema ne’ebé hein rezultadu 131, no husi númeru ne’e na’in-32 husi Munisípiu Liquiça.

Tuir dadus, sidadaun hamutuk 1.898 kompleta ona loron 14 iha kuarentena, tantu kuarentena obrigatóriu no auto-kuarentena iha Dili no munisípiu.

Totál ema ne’ebé kompleta ona loron 14 iha kuarentena hamutuk 1.898, iha Dili 1.476 no munisípiu sira na’in-401, enkuantu númeru amenta kompara ho horiseik (sábadu).

“Ema iha kuarentena obrigatóriu hamutuk 255 iha auto-kuarentena na’in 61, pasa ona loron 14 na’in-1.898. Atuál iha kuarentena obrigatóriu no auto-kuarentena hamutuk na’in-216”, Portavóz CIGC adianta.

Dadus haktuir tan, ema sira iha kuarentena hamutuk 316, na’in-61 halo auto-kuarentena iha munisípiu sira, iha Dili laiha, na’in 41 halo kuarentena iha fasilidade Governu nian iha munisípiu sira no na’in-214 halo kuarentena iha fasilidade Governu nian iha Dili.

Nune’e mós, profisionál saúde sira ne’ebé iha kuarentena hamutuk 59 maibé 19 teste dala rua tuir malu hetan rezultadu negativu ona ne’ebé sei hela na’in-40 mak sei iha kuareneta.

Enkuantu, teste hamutuk 688 amenta tán teste haat mai husi profesionál saúde, hein rezultadu na’in-131, kumulativu kazu konfirmadu na’in-24, kazu foun laiha, kumulativu kazu negativu 533 kompara horiseik (sábadu) na’in-501.

Liuhosi biban ne’e, CIGC apela ba públiku atu labele diskrimina sidadaun sira ne’ebé sai ona husi kuarentena no izolamentu tanba sidadaun sira ne’e sai, hetan sertifikadu husi médiku no Diretora Nasionál Kontrolu Saúde katak sira ne’e laiha ona vírus iha sira nia isin.

“Hakarak klarifika ba públiku katak, sira ne’ebé sai ona husi kuarentena, sertifika katak sei lalori moras iha sira nia isin, durante loron 14 iha kuarentena la hatudu sintoma moras nian. Kuandu iha balun iha kuarentena hatudu sintoma maka ami ba hasai teste no teste ne’e hatudu pozitivu ka provável, ema ne’e halo izolamentu kedas, no sira ne’ebé iha kuarentena kontinua kuarentena hahú husi loron dahuluk, ne’ebé ami garante katak durante loron 14 iha kuarentena laiha sintoma ba moras ne’e no bele garante katak sira laiha moras iha sira nia isin”, Sérgio Lobo afirma.

Nune’e mós, ba sira ne’ebé halo tratamentu iha izolamentu no sai ona, antes sai halo teste dala-rua tuir malu ho rezultadu negativu, atu hatudu katak sira-nia isin vírus laiha ona.

“Sira ne’ebé iha kuarentena antes fila simu sertifikadu ne’ebé hetan asinatura husi médiku ne’ebé durante akompaña sira iha kuarentena, diretora nasionál kontrolu moras nian”, nia salienta.

GICG mós kontinua apela ba komunidade atu mantein distansiamentu sosiál no distansiamentu fíziku, uza máskra, prátika ijiene pesoál ka fase liman ho bee no sabaun bebeik, inklui evita halibur malu.

“Husu ba populasaun tomak atu kontinua tau fiar ba Governu ne’ebé lidera prosesu ba metigasaun ba Coronavírus, husu ba ema hotu atu rona no fiar de’it informasaun sira ne’ebé sai husi konferénsia imprensa ne’ebé Sala Situasaun CIGC halo loron-loron iha tuku 15:00″, katak eis Governante ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here