Prezidente TLPU, Manuel Pinto ho Sekretariu Jerál, Horacio Babo. Imajen/Eugénio Pereira

DILI,03 maiu 2020 (TATOLI)-Prezidente Timor Leste Press Union (TLPU), Manuel Pinto hateten Jornalista iha dever no responsabilidade hodi fó informasaun ba públiku ho loloos no justu.

Manuel Pinto hato’o asuntu ne’e relasiona ho komemorasaun loron liberdade imprensa ne’ebé maka jornalista Timor-Leste komemora iha loron 03 maiu 2020, iha domingu ohin.

“Dever jornalista ninia mak atu hato’o informasauun ne’ebé evita estigma hodi  sosializa ba públiku atu hatene oinsá mak prevene an husi moras COVID-19  no depois oinsá mak hatene kura bainhira sira hetan moras ne’e,” katak Manuel Pinto, ba TATOLI, iha ninia servisu fatin Faról Dili.

Nia tenik tan, iha situasaun agora, jornalista sira iha papel importante atu luta hasoru COVID-19 liuhosi públikasaun notísia sira ne’ebé maka públika lorloron ba públiku.

Iha parte seluk, Prezidente Asosiasaun Jornalista Timor-Leste (AJTL), Zevonia Vieira, husu ba mídia na’in sira atu respeita no proteje direitu sira-nia jornalista hanesan ema profisionál.

“Direitu jornalista sira  hanesan sidadaun ida entaun nia mos tenki hetan vensimentu ne’ebé mak iha tanba servisu ne’ebé mak nia halo ne’e iha risku boot ida  no todan boot ida mak nia halo,” hateten Zevonia, durante konferénsia imprensa, iha Fundasaun Haburas Faról Dili, ohin.

Nia fó hanoin nafatin ba jornalista sira atu halo kna’ar ho responsabilidade no profisionál tuir kode étika jornalista hodi fó informasaun ba públiku.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here