Imajen Espesiál.

DILI, 03 maiu 2020 (TATOLI)—Sai hosi Suku Lelalai sei fila ba Lelalai. Hemu bee iha bee-matan Lelalai nian, sei lori hikas bee ba Lelalai. Han kumbili no fós hosi rai bokur Lelalai nian mak sai matenek tenke lori fila fós hodi habokur rai Lelalai. Se “kaan” tara hela iha rai Lelalai entaun labele haluha imi-nia rai moris fatin Lelalai.

Asaun no matenek ida ne’e implementa hosi Suku Lelalai oan ida ne’ebé buka matenek no hetan susesu iha rai badin (Dili). Maski nia hetan susesu ona maibé nia la haluha ninia rain moris fatin Suku Lelalai, Postu Administrativu Quelicai, Munisípiu Baucau. Biar nia hetan ona susesu nu’udar emprezariu Kompañia HERANTY MOTOR UNIPESSOAL, Lda, nia la fila kotuk no la taka matan ba nia rain moris fatin.

Evidénsia ida ne’ebé nia hatudu mak liuhosi asaun karidadade “Ajuda Ema KbiitLlaek Sira” ne’ebé daudaun ne’e nia halo. Bainhira, iha implementasaun Estadu Emerjénisa ba surtu COVID-19 iha períodu dahuluk ne’e, rezulta povu kbiit laek sira halerik ba hamlaha, nia iha inisiativa rasik hakarak ajuda povu kbiit laek sira iha ninia rain moris fatin (Suku Lelalai).

Nia ema ida ne’ebé moris simples. Nia naran Hernani Agostinho Soares. Nia nu’udar emprezariu no intelektual ida ne’ebé iha fuan atu fó apoiu ba ninia inan-aman sira ne’ebé hela iha Suku Lelalai ne’ebá. Tanba, nia hatene katak nia moris iha fatin ne’e no nia hatene ho di’ak tebes katak nia iha obrigasaun atu tulun sira ho buat ne’ebé nia hetan uitoan hodi fahe uitoan-uitoan ba ninia inan-aman sira ne’ebé presiza tulun.

Hernani Agstinho Soares/Imajen Espesiál.

“Ita hotu hatene katak implementasaun Estadu Emerjénsia ne’e rezulta ema barak mak lakon sira nia rendimentu liuliu ema sira ne’ebé mak buka osan loro-loron iha dalan hodi sustenta sira-nia moris. Situasaun ida-ne’e difikulta kbi’it laek sira hodi buka osan atu sosa sira-nia nesesidade bázika. Sira enfrenta hamlaha no sira konsege halerik ba Governu. Maibé Governu seidauk fó apoiu tanba sei kolekta hela dadus no buka mekanizmu ba distribuisaun apoiu refere. Se sira hein de’it Governu mak fó apoiu entaun prosesu ba apoiu ne’e sei kleur no fó implikasaun ba sira-nia moris. Ho ida ne’e mak ha’u iha inisiativa rasik atu fó apoiu ba povu kbi’it laek sira hodi hein ajuda hosi Governu,” dehan Emprezariu no Na’in ba Kompañia HERANTY MOTOR UNIPESSOAL, Lda, Hernani Agostinho Soares, ba Ajénsia TATOLI liuhosi entrevista via telefonika, domingu ne’e.

Tanba, nia dehan, haree hosi ekonomia uma-kain nian, ema barak mak seidauk hetan serbisu permanente no loro-loron sira buka osan rasik mak foin sustenta sira-nia moris. Entaun iha situasaun Estadu Emerjénsia (EE), obriga sira tenke kumpre no hela iha uma. Maibé, durante sira hela iha uma, sira laiha stoke aihan hodi han loro-loron nian tanba sira labele sai ba buka osan no serbisu iha situasaun EE nia laran.

Nia haktuir, durante situasaun EE ne’e uma-kain vulnerável barak mak halerik no ejize ba Governu atu fó apoiu imediatamente maibé Governu sei prepara hela dadus no mekanizmu ba distribuisaun subsidiu família iha pakote rekuperasaun. Tanba, prosesu verifikasaun dadus ba distribuisaun subsidiu família sei lori tempu kleur no komunidade sira iha situasaun vulnerável tebes.

Imajen Espesiál.

“Haree ba realidade ida ne’e, ha’u nu’udar timoroan sente triste tebes. Bainhira sira halerik liuhosi TV no husu para presiza hetan apoiu nesesidade bázika imediatamente. Ho ida ne’e, ha’u hakarak fó apoiu umanitária ba uma-kain vulnerável sira liuliu ba komunidade sira ne’ebé mak hela iha área rurál tanba sira seidauk hetan apoiu ruma hosi ema seluk. Maibé iha área rurál, ita-nia komunidade barak liu, ha’u mesak de’it mak fó apoiu entaun ha’u-nia forsa la to’o. Ho limitasaun ida ne’e, ha’u deside fó prioridade liu ba inan-aman sira ne’ebé mak kbi’it laek hanesan idozu sira, órfaun, viúva/u no defisiénsia fízika sira iha área rurál,” esplika Hernani Augusto Freitas ne’ebé iha tempu okupasaun Indonézia hala’o knar nu’udar pesoál saúde ne’e.

Atu hetan dadus hosi ema vulnerável hirak ne’e, nia hala’o Serbisu hamtuk kontaktu ho autoridade lokál hanesan Xefe Suku no Xefe Aldeia sira iha Suku Lelalai hodi intenfika no haruka dadus ba nia hodi nune’e bele fasilita nia atu fahe sasán.

“Ami iha kooperasaun di’ak ho autoridade lokál sira no sira rasik mak hamutuk ho ami halo distribuisaun. Sasán sira ne’ebé ami ajuda mak fós, supermie, Mina Bimoli, masako, masin, masin-midar, kafe, sabaun no rinso. Ami fahe ba uma-kain hamutuk 200 no kada uma-kain simu fós kilograma 10 inklui ho mina, sabaun, rinso kafe, masin no masin midar sira,” nia informa.

Nia haktuir, asaun karidade ne’e la’os hala’o de’it iha Suku Lelalai maibé hala’o mós ba suku viziñu sira ne’ebé besik Suku Lelalai hanesan fó ajuda mós ba komunidade iha Aldeia Sawakasa, Suku Laisorulai de Baixo no Aldeia Da’emena, Suku Abo (Quelicai).

“Sasán nesesidade bázika ne’e, ami uza transporte privadu hosi Dili hodi transporta ba Suku Lelalai. Maski kondisaun estrada aat maibé ami tenke mai para hodi ajuda sira. Apoiu ne’e ha’u pesoál o Kompañia HERANTY MOTOR UNIPESSOAL, Lda, mak prepara rasik,” nia hateten.

Hatán ba komunidade iha área rural la hasoru hamlaha tanba dadaun ne’e tempu koileta batar no hare, nia hateten, tuir ovservasaun katak komunidade sira koileta ona batar maibé komunidade sira labele han batar de’it maibé sira mós presiza fós hodi kahor ho batar no supermie hodi kahor ho modo-tahan ruma.

“Tuir ha’u-nia observasaun, komunidade iha área rurál koileta duni batar maibé sira labele han de’it batar. Sira presiza mós fós kahor ho batar no supermie hodi kahor ho moda tahan ruma. Sira presiza masako, masin, kafe, masin-midar, rinso hodi fase roupa no sabaun hodi haris. Ida ne’e, nesesidade bázika ne’ebé ita-nia komunidade sira iha área rural presiza tebes,” nia dehan.

Entretantu, Xefe Aldeia Maluro, Paulo de Jesus Fernandes, hato’o agradese ba Lelalai-oan ne’ebé iha insisativa rasik hodi fó ajuda ba povu kbiit laek sira iha ninia aldeia. Tanba, nia hatene katak iha Estadu Emerjénsia ba surtu COVID-19 ne’e só Lelalai oan de’it mak iha fuan atu fahe buat ne’ebé nia iha ba faluk no oan-ki’ak sira iha Suku Lelalai.

“Ajuda ida ne’e la’os mai hosi Governu maibé maihosi Lelalai-oan ida ne’ebé hanoin ba ninia inan-aman kbiit laek sira. Tanba, nia tauk, katak ita hamlaha no mate karik mak duun fali ba moras COVID-19 ne’e mak nia mai fó ajuda ba ita ne’e,” nia hateten.

Iha biban hanesan, Xefe Aldeia Dawaduka, António Ribeiro, lori povu nia naran hato’o agredese ua’in ba Kompañia HERANTY MOTOR UNIPESSOAL, Lda, ne’ebé fó apoiu sasán nesesidade bázika ba ninia povu atu bele hatutan moris durante implementasaun Estadu Emerjénsia períodu daruak ne’e.

“Nu’udar Xefe Aldeia Dawaduka, Suku Lelalai, hodi povu nia naran hato’o agradese ba Lelalai-oan, Dutór Hernanio Augusto Soares. Durante ne’e, nia boot iha rai ne’e no ba rai badin hodi buka-matenek no hetan serbisu ruma, ho ninia posibilidade hodi ajuda ninia inan-aman no komunidade Aldeia Haat iha Suku Lelalai ne’e. Ami husu mós ba Suku Lelalai nia oan sira ne’ebé iha rai boot ne’ebá, imi serbisu hamutuk bá hodi tau kbiit hamutuk atu ajuda ami, imi-nian inan-aman sira ne’ebé hela iha Suku Lelalai ne’e,” nia apela.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here