Prezidente Eleitu AJTL, Zevonia Viera ho Nia Membro Ajtl Sira Halo Konferensia Imprensa Kona-ba Liberdade Imprensa iha Timor-Leste (3 Maio 2020.) Imajen/Egas Cristovão

DILI, 03 maiu 2020 (TATOLI)-Prezidente Asosiasaun Jornalista Timor-Leste (AJTL), Zevonia Vieira, kongratula Jornalista Timoroan no Mídia Nasionál tanba iha domingu (03/05/2020)ohin, komemora loron mundiál liberdade imprensa.

Tuir nia durante ne’e mídia kontribui maka’as ba prosesu dezenvolvimentu liliu harii páz no demokrasia liuhosi públikasaun informasaun.

Liuhosi konférensia imprensa hodi komemora loron liberdade imprensa ohin, Prezidente AJTL ne’e kontinua apela ba Jornalista Sira no mídia nasionál hotu atu kontinua halo kobertura ba asuntu propagasaun COVID-19 maibé tenki tuir kode étika jornalista no tane a’as nafatin cover boths sides.

”Jornalista no mídia hola papel importante tebes iha situasaun ne’e tanba bele informa no eduka sidadaun sira atu halo asaun preventiva hasoru Coronavirus no luta hasoru informasaun falsu sira ne’ebé ema iresponsavel sira lansa iha mídia sosiál,” tenik Zevonia Vieira, iha Fundasaun Haburas Faról, Dili.

Mídia iha papel importante tebes hodi transmite no publika informasaun sira edukativu hodi nune’e sidadaun-sira bele halo prevensaun ba propagasaun surtu COVID-19.

Jornalista Timoroan tenki luta hasoru informasaun hoax no fake news ne’ebé espalla iha mídia sosiál atu nune’e labele hamosu pániku iha komunidade nia leet.

”Liliu informasaun falsu sira iha relasaun ho asunto COVID-19 ne’ebé la’ós maihusi fonte sira kredivel,” dehan prezidente AJTL.

Iha okaziaun ne’e, Nia mós husu Mídia na’in sira atu garante moris di’ak jornalista Timoroan sira liliu labele koa saláriu jornalista durante implementasaun estadu emerjénsia.

AJTL nu’udar organizasaun ne’ebé sai mahon ba jornalista Timor-Leste ne’ebé durante ne’e kotribui ona ba liberdade imprensa no hametin kompetensia jornalista sira nian liuhusi formasaun lubuk ida no halo advokansia ba jornalista bainhira hasoru problema.

Asosiasaun estabelese ona kooperasaun ho organizasaun no ajénsia lubuk ida, tantu iha rai laran, hanesan SEAPA, IFJ, UNESCO, AJI, UNDP, Konsellu Imprensa , RENETIL, TLPU no kanál mídia hotu-hotu nee’bé ejiste iha Timor-Leste.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here