Komandante PNTL Munisípiu Dili, Superintendente Xefe Armando Monteiro. Imajen/Antonio Goncalves

DILI, 02 maiu 2020 (TATOLI) – Transporte públiku, hanesan taxi, mikrolete, bis no angguna, presiza mós kumpre distansiamentu fíziku atu asegura pasajeiru sira-nia saúde hosi propagasaun surtu Coronavirus ka COVID-19.

Notísia Relevante : PNTL ho F-FDTL Monta “Postu Operasaun” Haat iha Dili

Atu garante transporte públiku kumpre distansiamentu fíziku ba pasajeiru sira, maka Komandu Polísia Nasionál Timor-Leste (PNTL) Munisípiu Dili sei halo sensibilizasaun ba motorista sira ne’ebé kondús transporte públiku kona-ba prosedimentu distansiamentu fízika.

Komandante PNTL Munisípiu Dili, Superintendente Xefe Armando Monteiro, informa, daudaun ne’e ekipa Komandu PNTL halo hela koordenasaun ho Governu hodi regula ninia regra ba kada transporte públiku sira para bele kontribui halo prevensaun ba propagasaun surtu COVID-19.

“Ofisial Polísia Suku (OPS) sei identifika ita-nia Asosiasaun Taxi, Mikrolete, Bis no angguna,  hodi ami halo sorumutuk ida para hato’o regra Estadu Emerjénsia hodi sira mós kumpre bainhira tula pasajeru sira,” hateten  Armando Monteiro, ba jornalista, ohin, iha Komandu PNTL Munisípiu Dili.

Superintendente Xefe Armando dehan, bainhira polísia sensibiliza tiha informasaun maka parte motorista sira la kumpre, maka PNTL sei prende transporte no selu multa ba estadu tuir lei.

Parte seluk, Komandu PNTL mós prontu serbisu hamutuk nafatin ho Grupu Juventude Movimentu Tasi-Moos (MAMA BOLU) hodi ajuda polísia rega ai-moruk dezinfeta ba transporte públiku ho edifísiu públiku sira.

Jornalista  : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here