ATAURO, 02 maiu 2020 (TATOLI)-Ekipa Ministériu Saúde (MS) halo teste infrared thermometer ba pasajeiru sira Roo Nakroma nian molok hala’o viajen hosi Atauro mai Dili.
Notísia Relevante : Governu Sosializa Medida Prevensaun COVID-19 ho Denge iha Atauro
Teste infrared thermometer ne’e atu identifika temperatura isin-manas ho grau tenke normal ka la bele liu grau 37. Se liu ida ne’e, bele submete ba analiza sintoma surtu Coronavirus ka COVID-19.
Ekipa MS mós halo dezinfeta ba sasán pasajeiru sira-nian inklui karreta ho motor molok pesoál serbisu iha roo Nakroma nian autoriza tama ba roo-laran.
Ba Ajénsia Tatoli, sábadu (02/05/2020), iha Portu Beloi, Atauro, Xefe Sentru Saúde Atauro, Januário Domingos, hateten, ho meius sira-ne’e hotu atu halo prevensaun ba transmisaun peste letál COVID-19.
“Ami halo pasa revista hodi halo teste infrared thermometer ne’e hahú kedas iha semana-rua liu ba. Pasajeiru ne’ebé de’it molok tun hosi roo no atu sa’e ba roo tenke submete ba teste ne’e,” hateten Januário Domingos.
Xefe Sentru Saúde Atauro, Januário Domingos reforsa mós katak, sira-nia parte kria ona ekipa COVID-19 ne’ebé envolve mós parte sira hosi Ministériu Administrasaun Estatal, Saúde no Polísia Nasionál Timor-Leste (PNTL) hodi apoiu malu halo serbisu luta kontra propagasaun COVID-19.
Sentru Saúde Atauro mós hetan ona apoiu ekipamentu sira, hanesan mákina infrared thermometer, ekipamentu protesaun, máskara no luvas ne’ebé sufisiente atu hala’o serbisu prevensaun surtu COVID-19.
Jornalista : Nelson de Sousa
Editór : Francisco Simões
