PNTL Munisípiu Dili halo operasaun hodi asegura oden estadu emerjénsia. Imajen/Eugénio Pereira

DILI, 02 maiu 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, fó ona orientasaun ba ekipa polísia hodi hahú halo operasaun kona-ba  sensibilizasaun  informasaun no regra  implementasaun Estadu Emerjénsia (EE) etapa daruak ka segunda etapa nian.

Komandante Alerta Kuartél Jerál PNTL, Superintendente Nicolau F. da Costa, informa, sensibilizasaun informasaun ne’e parte PNTL halo iha área sira ne’ebé importante hanesan fatin negósiu no hamosu engarrafamentu hanesan área Audian, Becora, Portu Dili, Rotunda Nicolau Lobato, Becora no fatin seluk tan.

“Komandu Jerál fó ona orientasaun hodi haree ba segundu faze implementasaun Estadu Emerjénsia (EE) tuir dekretu lei Númeru 8/2020. Ami kontinua serbisu hodi sensibiliza informasaun ba ita-nia komunidade sira hodi prevene-an hosi propagasaun surtu Coronavirus ka COVID-19,” informa Superintendente Nicolau F. da Costa, ba Ajénsia Tatoli iha Kuartél Jerál PNTL, Caicoli, Dili, sábadu (02/05/2020).

Tuir orientasaun no diretiva ne’ebé fó sai hosi Komandu Jerál nian maka orienta abitante sira bainhira halo viajen ho transporte hotu-hotu tenke kumpre regra hanesan uza máskara, kumpre distánsia sosiál no distánsia fíziku.

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here