Imajen Tatoli/Osória Marques.

MANATUTO, 02 maiu 2020 (TATOLI)–Governu liuhosi Sentru Intergradu Jestaun Krize (CIGC-sigla portugés), ohin, re-integra tan estudante hamutuk 41 ne’ebé kumpre ona kuarentena durante loron 14 iha Hotel SURPRISE Manatuto ba sira-nia família.

Responsável Kuarentena Hotél SUPRISE, Médiku Jerál, Maria Izaura C. Soares hateten, hosi pesoál kuarentena hamutuk 41 ne’e kompostu hosi mane na’in 11 no feto na’in 30, ho idade hosi 15-24 hamutuk iha 28 (feto na’in 11 no mane na’in 7) no idade adultu hosi 25-40 hamutuk na’in 11 (feto na’in 9 no mane na’in 3).

Nia informa, pesoál kuarentena iha Hotel SURPRISE ne’e maihosi Munisípiu hitu mak hanesan Aileu ema na’in ida (1), Baucau na’in rua (2), Dili na’in 24, Lautem na’in rua (2), Manufahi na’in tolu (3) no Viqueque na’in (8) no pesoál kuarentena ida mak moras no lori ba Dili hodi kontrola maibé alta ona.

Estudante sira ne’e, nia haktuir, maihosi nasaun Indonézia ne’ebé afetadu ona ho transmisaun lokál mak hosi Sidade Kediri, Bandung, Malang, Semarang, Solo, Surabaya no Yogyakarta.


Imajen Tatoli/Osória Marques.

Médiku Jerál ne’e afirma, durante loron 26 nia laran pesoál saùde hamutuk pesoál kuarentena sira ne’e halo atividade hanesan limpeza diária, orasaun dadeer, promosaun saùde no informasaun kona-ba regra kuarentena no seluk tan.

“Ami simu ona orden atu implementa responde pandemia COVID-19 hanesan hela iha kuarentena ida ne’e atu halo atendementu másimu no direitu ba pesoál kuarentena sira hotu tuir tempu ne’ebé determina ba situasaun no kondisaun iha tempu saida de’it,” dehan Médiku Jerál, Maria Izaura C. Soares, iha nia deskursu ia Hotel SUPRISE Manatuto, sábadu ne’e.

Entretantu Diretora Jerál Prestasaun Servisu Saúde, Odete Viegas hateten, maski iha Timor Leste enfelizmente laiha moras ne’ebé aumenta pozitivu maibé rekupera mós aumenta.

“Hanesan ita hotu hatene moras COVID-19 pozitivu la aumenta ona no rekupera mós aumenta. Nune’e, husu atu ba pesoál kuarentena atu kuidadu nafatin ijiéne pesoál ho ijiéne iha ita-nia hela fatin. Bainhira nesesariu mak foin sai maibé tenke uza máskara,” nia apela.

Iha fatin hanesan, Prezidente Autoridade Munisípiu Manatuto, Fernando de Sousa Junior, husik hela mensajen ba pesoál kuarentena sira atu iha konsiénsia ba saùde públiku ne’e iha ida-idak nia konsiente.

“Saúde públiku ne’e iha ita ema ida-idak nia konsiénsia tanba hosi parte Ministériu Saúde ko’alia hela de’it asuntu ne’e maibé komunidade laiha konsiénsia maka ita sei hasoru susar,” nia dehan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here