Vitima Isac dos Santos, hala'o hela tratamentu intensivu iha HNGV, kinta (30/04/2020). Imajen/Espesiál

DILI, 01 maiu 2020 (TATOLI)-Diretór Klínika Ospitál Nasionál Guido Valadares Dili (HNGV-sigla portugés), Flavio Brandão, informa ekipa médiku HNGV halo ona operasaun ba vitima Isac dos Santos ne’ebé ema deskoñesidu tiru ho kilat iha área Lebukoe, Suku Vaviquina, Postu Administrativu Maubara, Munisípiu Liquiça, iha kinta (30/04/2020), iha tuku 18:11 Otl.

Vitima evakua ba Ospitál nasionál mazumenus tuku 10:00 Otl, kalan hodi hetan tratamentu intensivu hosi profisionál saúde sira.

”Momentu ne’e nia kondisaun di’ak oituan ona tanba hetan tratamentu másimu husi ita nia médiku sira ne’ebé mak hala’o kna’ar iha HNGV,” reforsa Diretóra Klínika HNGV ba TATOLI, via telefone, sesta ohin.

Notísia Relevante :Ema Deskoñesidu Tiru Kanek Isac iha Maubara

Nia esplika vitima Isac daudaun ne’e baixa hela iha sala sirúrjia, para médiku sira kontinua halo tratamentu emidiatamente atu pasiente bele rekupera lalais.

”Nia kanek ne’e tama iha kategoria grave maibé atu detallu liu ne’e médiku sira haree no halo relatóriu médiku mak foin ita hatene nia klasifikasaun,” dehan Diretór Kliniku Ospitál Nasionál Guido Valadares Flavio Brandão.

Tuir nia Joven ne’e hetan tiru iha knotak karuk hodi borus ba ninia pulmaun no orgaun seluk.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here