Autór Ajente Polísia JAS ne'ebé tiru vitíma Isac detein ona iha Komandu Polísia hodi submete ba investigasaun. Imajen/Espesiál

DILI, 01 maiu 2020 (TATOLI)- Komandu Polísia Nasionál Timor-Leste (PNTL) liuhosi ekipa Investigasaun Nasionál ho ekipa investigasaun polísia Munisípiu Liquiça halo ona investigasaun kle’an no detein ona Ajente Polísia ho inisiál JAS ne’ebé lori pistola tiru kanek vítima Isac dos Santos da Silva, kinta (30/04/2020), iha Maubara.

Notísia Relevante : Autór Tiru Isac iha Maubara Ajente PNTL

Membru F-FDTL ho PNTL halo inspesaun lokál ba akontesimentu Ajente Polísia JAS tiru vitíma Isac iha Maubara, Liquiça. Imaajen/Eugénio Pereira

Komandante Jerál PNTL Komisáriu Faustino da Costa, deklara, kazu ne’e nu’udar tristeza boot ba Instituisaun PNTL, tanba ajente polísia ida halo atuasaun lori arma tiru vítima too hetan kanek grave.

“Autór ida ne’e identifikadu hanesan ajente polísia ne’ebé la’ós iha tempu halo serbisu no tempu ida ne’ebé nia folga. Agora, autór iha PNTL nia-liman no dezarmada ona hodi submete ba investigasaun no detein iha sela polísia hodi hein prosesu kriminál,” hateten Komisáriu Faustino da Costa, sesta (01/05/2020), liuhosi konferénsia imprensa iha Komandu Jerál PNTL, Caicoli, Dili.

Nu’udar Komandante Jerál Instituisaun PNTL, Komisáriu Faustino da Costa, lamenta tebes ho atitude Ajente polísia JAS nian hodi hamosu violénsia no pániku iha komunidade nia-leet.

“Lamenta tebes ba aktu no violénsia ida-ne’e, tanba polísia eziste tinan 20 iha lei orgánika PNTL regula kona-ba regra interna utilizasaun forsa inklui arma,” afirma Faustino da Costa.

Notísia Relevante : Ema Deskoñesidu Tiru Kanek Isac iha Maubara

Komisáriu Faustino da Costa hateten, tuir loloos Ajente  polísia  JAS  atu halo atuasaun tenke bazeia ba regra no regulamentu PNTL nian ne’ebé vigor.

Ho aktu violénsia no krime grave ne’ebé Ajente polísia JAS komete, Komandu PNTL hasai ona orden ba ekipa konjunta ida hodi halo prosesu investigasaun liu-liu ba asuntu dixiplinár nian.

Ekipa konjunta ne’e rasik kompostu hosi Serbisu Investigasaun Kriminál Nasionál (SIKN), Gabinete Inspesaun Jerál PNTL no Departamentu Justisa PNTL.

Komandante Jerál PNTL, Komisáriu Faustino da Costa. Imajen/Eugénio Pereira

Faustino da Costa informa, Komandu PNTL mós koloka ona membru hodi akompaña kondisaun vítima iha ospitál haree katak, vítima ho kondisaun grave tebes, maibé fó ona deklarasaun ba parte PNTL.

Komisáriu Faustino da Costa husu ba família atu koopera nafatin ho Instituisaun PNTL hodi lalika hanoin kria-fali problema ho suspeitu nia família.

Iha oportunidade ne’e, Komandu PNTL alerta ba membru tomak tenke kaer metin lema PNTL katak, dixiplina nu’udar kultura úniku ne’ebé Instituisaun PNTL implementa atu membru hotu kumpre sein rezerva.

Tuir planu, iha tempu besik Komandu PNTL sei kria enkontru superiór PNTL ho komisaun dixiplinár atu bele prepara paresér hodi foti desizaun ikus ba destinu autór JAS.

Tuir observasaun Ajénsia Tatoli iha terrenu nota katak, karreta baskulante ne’ebé autór uza ka kondús iha ona  PNTL Liquiça no Komandu Polísia Liquiça mós investiga mós sasin-balun ne’ebé la’o hamutuk ho autór.

Iha sesta lokraik ne’e, Komandu PNTL koloka ekipa nasionál sei ba foti autór ne’e hodi kontinua prosesu investigasaun kle’an iha Komandu Jerál PNTL iha Dili.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here