Traballadór sira kuda hela duut hodi finaliza konstrusaun ponte iha área Bidau Santana, Dili, iha loron 5 abríl 2019. Imajen Tatoli/António Gonçalves

DILI, 01 maiu 2020 (TATOLI) – Seretáriu Estadu Formasaun Profisionál no Empregu, Julião da Silva husu ba empregadór sira atu kontinua nafatin respeita direitu tomak traballadór nian.

“Husu atu ita-nia empregadór sira ka ba sira ne’ebé fó servisu, atu kontinua nafatin respeita direitu tomak ne’ebé maka maluk servisu na’in sira merese atu hetan iha sira-nia servisu fatin tuir lei haruka”, hateten Seretariu Estadu Julião da Silva liuhosi nota impensa ne’ebé Agência Tatoli asesu iha pájina ofisiál Seretaria Estadu Formasaun Profisionál no Empregu (SEFOPE), sesta ne’e.

Nia dehan, Governu komprometidu katak iha loron ida sei oferese forsa traballu sira ho di’ak no kualidade ba traballadór sira maski la’o neneik maibé sei hakat bebeik ba oin.

“Ami rekoñese katak dala ruma ita-nia servidór ka servisu na’in sira hala’o sira-nia kna’ar ho responsablidade no ho di’ak tebes tuir empregradór sira nian hakarak. Maibé ami fiar katak iha loron ida ita hotu (Governu inklui setór privadu ) nia responsablidade tomak atu hadi’a di’ak liután”, nia adianta.

Nune’e, nia kongratula ba traballadór sira ne’ebé namkari iha mundu tomak, liuliu Timor-Leste tanba loron 1 maiu nu’udar loron espesiál ba traballadór tomak.

“Loron ohin ne’e nu’udar loron espesiál ba ita hotu, tanba ne’e mai ita kuidadu saúde no uza  nafatin meiu hirak ne’ebé Estadu estabelese ona hodi hadook-an husi COVID-19, utiliza nafatin instrumentu hirak ne’ebé oferese ona husi empregadór sira hodi salva ita-nia vida no saúde”, nia akresenta.

Maski nune’e, SEFOPE mós husu ba traballadór sira nafatin hodi kontinua hatudu dezenpeñu ne’ebé di’ak ba empregadór sira.

“Fó másimu liu ba konsumidór sira husi saida maka ita hetan, atu loron ida ita sei hetan liu fali saida maka ita fó”, apela Sekretáriu Estadu ne’e ba traballadór sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here