Aktividade traballadór sira ne’ebé halo servisu konstrusaun ba Ponte Comoro 3 iha área Fomento Comoro, Dili iha loron 17 maiu 2017. Imajen Tatoli/António Gonçalves

DILI, 01 maiu 2020 (TATOLI) – Prezidente Konfederasaun Sindikatu Timor-Leste (KSTL), Almerio Vila Nova, husu ba Governu atu tau nafatin prioridade ba revizaun saláriu mínimu iha ajenda polítika hodi garante nafatin traballadór sira nia liberdade tuir konstituisaun Repúblika Demokrátiku Timor Leste (RDTL) hodi moris ho dignu.

Tuir Almeiro, Governu iha responsabilidade atu garante moris dignu ba traballadór ho ninia família sira.

“Ita hatene katak maioria povu Timor-Leste ne’e ema ho traballadór, ne’ebé Governu hanoin atu fó bem estar ba nia povu tenke konsidera mós povu nia rendimentu mensál kada fulan. Tanba kuandu rendimentu di’ak maka bele hadi’a kualidade moris traballadór ho dignu,” tenik Prezidente KSTL ba Agência Tatoli iha sede KSTL, Bemori, sesta ne’e.

Bainhira traballadór ho família atu moris dignu, Dirijente KSTL ne’e dehan Governu tenke halo revizaun ba saláriu mínimu husi $115 ba $200 kada fulan.

Tuir Almerio Vila Nova, KSTL submete ona proposta ba Ministériu Koordenadór Asuntu Ekonómiku (MKAE), kona-ba revizaun saláriu mínimu ba $200 kada fulan.

“Tanba liuhosi prosesu peskiza ida ne’ebé mak KSTL halo, bainhira ita hakarak konsidera traballadór ida nia moris dignu iha fulan ida nia laran só hetan saláriu $200 iha fulan ida,” katak lideransa sindikatu traballadór ne’e.

Entretantu, saláriu mínimu ne’ebé KSTL propoin, halo ona kálkulu ba nesesidade báziku.

“Enkuantu tun husi montante $200 ne’e signifika katak traballadór no ninia família seidauk moris ho dignu iha fulan-ida nia laran”, katak Almerio.

Ho nune’e, Prezidente KSTL haktuir proposta alterasaun sálariu mínimu, KSTL hamutuk ho Konsellu Nasionál Traballu submete ona ba MKAE iha fulan-dezembru 2019 atu kontinua prosesu ba diskusaun iha Konsellu Ministru no bele konsidera.

“Infelismente prosesu ida-ne’e husi parte MKAE nian seidauk aselera, ne’ebé iha oportunidade ida ne’e ami nafatin hato’o ba Governu atu kontinua tau konsiderasaun maski ita iha situasaun luta kontra COVID-19, maibé keta haluha sálariu mínimu mós bele fó kualidade mínimu ba moris traballadór ho ninia família”, nia adianta.

Biban ne’e, KSTL kontinua apela ba traballadór iha Timór laran tomak atu halo tuir medida prevensaun husi Ministériu Saúde no Organizasaun Mundiál Saúde hanesan aplika distansiamentu sosiál iha servisu fatin, fase liman bebeik, uza máskara no luvas hodi nune’e bele prevene infesaun COVID-19.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here