Timoroan Na'in Sanulu sai ona hosi Fatin Izolamentu Sentru Saude Vera Cruz. Imajen/Egas Cristovao

DILI,01 maiu 2020 (TATOLI)-Estudante Timoroan na’in 10, iha sesta (01/05/2020) sai ona hosi fatin izolamentu COVID-19, Sentru Saúde Vera Cruz hafoin rejultadu teste laboratóriu fó sai dala rua tutuir malu negativu ona hosi surtu coronavirus.

Hosi pasiente COVID-19 na’in 10 ne’e kompostu hosi feto na’in lima no mane lima. Ema na’in neen hosi Munisípiu Dili, Na’in rua hosi Baucau, Viqueque na’in ida no Manatuto ida.

Portavóz Sentru Integradu Jestaun Krize (CIGC-sigla portugés), Sergio Lobo, hafoin re-integra estudante ne’e hodi fila ba idaidak nia família hateten pasiente hirak ne’e negativu ona ba surtu COVID-19.

 Notísia Relevante : Timoroan Na’in-Lima Sai Ona Hosi Sala Izolamentu

Maski livre ona, Doutór Sergio Lobo kontinua husu ba estudante na’in 10 ne’e atu kumpre nafatin regulamentu sira hanesan mantein distánsia sosiál, fase liman beibeik ho sabaun, me’ar ka fani tenki taka ibun no seluk tan.

“Ita nafatin fó agradese ba sira nia disponibilizasaun no kolaborasaun hodi koopera ho governu liu-liu ho parte médiku sira hodi hakarak hela iha fatin Kuarentena no izolamentu tanba sira hatene no komprende kona-ba impaktu husi virus ne’e rasik,” tenik Eis Ministru-Saúde.

Iha biban hanesan, Reprezentante pasiente COVID-19, na’in 10, Feliciano de Carvalho, agredese ba governu tanba fó ona tratamentu saúde durante iha fatin kuarentena no izolamentu.

“Médiku sira halo esplikasaun katak, ha’u laiha sintoma kona ba isin manas no me’ar maibé ha’u iha de’it virus oituan iha kakorok, tanba ne’e mak sira tenki transfere ha’u mai iha izolamentu Vera Cruz hodi bele halo observasaun,”katak Nia.

Entretantu, Daudaun ne’e ema na’in 16 maka rekupera ona hosi COVID-19, Na’in sira ne’e na’in haat kategoria provavel, no na’in 12 pozitivu.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here