Vise Prezidente Parlamentu Nasionál, Maria Angelina Sarmento. Foto Egas Cristóvão

DILI, 01 maiu 2020 (TATOLI)—Vise-Prezidente Parlamentu Nasionál, Deputada Maria Angelina Sarmento Lopes, hato’o parabéns ba servisu-na’in ka traballadór sira hotu iha setór públiku ka setór privadu maibé husu ba empregadór (patraun)  sira atu konsidera mós traballadór sira-nia kontribuisaun ba empreza no instituisaun.

Ho selebrasaun ne’e, nia hatutan, motiva ema idak-idak hala’o kna’ar no funsaun atu dezenvolve moris liuliu kontribui ba dezenvolvimentu ekonomia atu-bele kore-aan hosi mukit.

Deputada PLP ne’e realsa, traballadór sira presiza hamosu kreatividade, inovasaun, badinas no prontu adapta-aan ho teknolojia hodi bele sai produtivu liután no kontribui ba moris di’ak ho sustentável.

“Iha setór privadu, presiza konsidera traballadór sira-nia kontribuisaun ba empregadór sira bazeia ba sira-nia disiplina, onestidade, badinas, hakruuk ba orientasaun empregadór. Empregadór sira presiza hakruuk ba lei sira ne’ebé vigora iha ita-nia rai, kompensasaun remuneratòriu tuir lei traballadór nian, rekompensa mós sira bainhira sira servisu iha loron boot ka feriadu liuhosi fó bonus ba sira, hodi motiva sira-nia servisu,” dehan Deputada Maria Angelina Sarmento Lopes, ba Ajênsia TATOLI realasiona ho Selebrasaun Loron Mundiál Traballadór (May Day) liuhosi whatsapp, sesta ne’e.

Regra hirak ne’e, nia hateten, tenke aplika hosi setór privadu sira atu estimula motivasaun traballadór sira-nian hodi presta servisu ho kualidade no responsabilidade.

Reprezentante Povu ne’e rekomenda atu empregadór presiza envolve traballadór sira atu hamosu kreatividade no dezenvolve setór produtivu bazeia ba demanda merkadu nasionál no mundiál nian, atu bele loke-aan ba kompetisaun nível rejionál no internasionál.

Maske nune’e, nia dehan, presiza sukat mós setor privadu sira-nia kapasidade absorve osan ka retornu ne’ebé sira simu hosi produtu ne’ebé sira fa’an. Se sira hetan retornu kiik, sira bele halo sira-nia polítika (kebijakan) rasik no halo diálogu ho sira-nia empregadu sira atu-bele iha entendimentu mútua entre sira.

“Empreza sira mós tenke hakruuk ba polítika kona-ba seguransa sosiál ne’ebé sira iha devér selu 4% hosi saláriu ko’a ba seguransa sosiál ba sira-nia traballadór. Estadu presiza kria baze de dadus kredivel kona-ba kontribuisain setór privadu nian 4% ne’e atu motiva empregadór sira kontinua selu osan seguransa sosiál nian,” Deputada PLP ne’e fó hanoin.

Reprezentante povu ne’e hateten, buat-ne’ebé governu presiza halo mak kontinua halo akompañamentu ba setór privadu sira-nia dezempeñu iha implementasaun regra hirak-ne’ebé aplika iha ita-nia rain no kontinua halo sosializasaun ba direitu no dever traballadór sira-nian.

Tuir nia, presiza haforsa Sekretáriu Estadu ba Formasaun Profisionál no Empregu (SEFOPE) nia kna’ar hodi fó formasaun kontinua ba traballadór sira, liuliu skill sira-ne’ebé iha ligasaun ho nesesidade merkadu traballu nian, atu rezultadu formasaun nian bele iha duni resposta serta ba empreza nia nesesidade bazeia ba empreza nia polítika no tarjetu.

“Presiza halo akompañamentu nafatin ba setór privadu sira atu la abandona sira-nia responsabilidade hodi selu taxa ba estadu. Atualiza dadus setór privadu nian no dadus traballadór nian, hodi nune’e sira kontinua halo sira-nia devér selu taxa no kontribui ba seguransa sosiál no hamutuk ita dezenvolve ita-nia ekonomia di’ak liután. Maibé, kontinua kria kondisaun traballu no tratamentu dignu ba traballadór sira hotu,” nia dehan.

Deputada ne’e hatutan, traballadór sira setór públiku atu haburas espíritu kreatividade, disiplina, hadomi nia kna’ar no profisaun, servisu iha ekipa hodi kontribui ba objetivu komún no interese komún.

Nune’e mós, nia hateten, presiza insentiva traballadór sira liuhosi kompensasaun remuneratóriu ba sira-nia servisu ho dignu, kontinua fó formasaun atu eleva sira-nia kapasidade di’ak liután hodi serví, promove sira -nia kareira bazeia ba méritu no esperiénsia no iha balansu jèneru atu-bele servisu hamutuk hodi alkansa objetivu komún.

Nia esplika, saláriu ne’ebé traballadór sira simu bazeia ba lei ne’ebé vigora iha rai ida-ne’e ,maibe kada tinan sei di’ak liu Governu kontinua halo estudu no anàliza mikro no makro-ekonòmiku hodi atualiza informasaun kona-ba presu sasán iha merkadu, inflasaun mèdia (rata-rata) rejonál no nasionál no mós gastus uma-kain nian, hodi nunee Governu bele tetu no deside aumentu ba saláriu mìnimu traballadór sira-nian.

Notísia Relevante: SEFOPE Husu Empregadór Sira Nafatin Respeita Direitu Traballadór

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here