Portavóz CIGC, Odete Viegas. Imajen/Egas Cristovão

DILI, 01 abríl 2020 (TATOLI)-Portavóz Sentru Integradu Jestaun Krize (CIGC), Odete Viegas da Silva informa ekipa servisu iha liña oin ba kombate transmisaun COVID-19 sei hetan subsídiu hosi Governu.

Diretóra Jerál Prestasaun Saúde ne’e dehan prosesu pagamentu ba subsidiu ne’e sei hala’o iha tempu badak.

Ekipa Front Line ne’e kompostu hosi ekipa médiku, FALINTIL-Forsa Defesa Timor-Leste (F-FDTL), Polisia Nasionál Timor-Leste (PNTL), Jornalista no seluk tan.

“Ita iha kritéria 3 ne’ebé mak deside ba ema sira ne’ebé mak servisu iha front line (liña oin) kritéria sira ne’e iha mós ninia klasifikasaun,” dehan nia ba jornalista sira liuhusi konférensia imprensa iha CCD, sesta ohin.

Kritéria dahuluk, haree liubá ekipa servisu iha fatin Izolamentu, Laboratóriu, Ekipa Vizilánsia Epidemiolójia.

Daruak, maka ekipa servisu sira ne’ebé destaka iha fatin kuarentena no Portu, aeroportu no fronteira terrestre.

Kritéria ikusliu maka ba sira ne’ebé mak halo servisu hodi fó apoiu ba surtu COVID-19 nian maibé la direitamente hasoru pasiente Coronavirus.

“Ita deside ho razuavel montante tuir kritéria 3 ne’e maibé agora ha’u seidauk bele fó sai ninia montante hira, maibé ita hotu hein iha tempu badak nia laran, konserteja ema hotu ne’ebé mak durante ne’e servisu sei hetan direitu ida ne’e,” tenik tan.

Jornalista     : Tomé Amado

Editór           : Agapito dos Santos

2 KOMENTÁRIU

  1. Oinsá ami husi DEPARTAMENTO COMERCIALIZAÇÃO E IMPORTAÇÃO, husi Equipa TASK FORCE COVID-19 MTCI, ne’ebé halo KONTROLU NO MONITORIZASAUN ba presu sasán nesesidade báziku ( bens essenciais) iha merkadu no stock iha Municipio 11 inklui Dili, durante periodu EE, ami mos iha direito atu hetan subsidio ga lae?

HAKEREK NO HATÁN

Please enter your comment!
Please enter your name here