Prezidente Partido CNRT no Prezidente AMP, Kay Rala Xanana Gusmão, Gusmão. Imajen/Egas Cristóvão

DILI, 30 abríl 2020 (TATOLI)—Prezidente Koligasaun Aliansa Maioria Parlamentár (AMP) atuál Prezidente CNRT, Kay Rala Xanana Gusmão, la hirus Partidu Kmanek Haburas Unidade Nasionál Timor-Oan (KHUNTO) ne’ebé sai ona hosi aliansa ida-ne’e maibé husu halo konferénsia estraordinária hodi deklara sai.

“Horisehik, ha’u simu hosi KHUNTO, transmite pozisaun KHUNTO nian sai hosi koligasaun foun. Ami la hirus imi (KHUNTO), ne’e demokrásia. Maibé atu fó lembra de’it katak ida-ne’e la to’o. Katak, tenke halo konferénsia estraordinária ida hodi dehan sai,” dehan Xanana Gusmão liuhosi konferénsia imprensa ne’ebé hala’o iha Sede CNRT iha Bairro dos Grilhos, Dili, kinta ne’e.

“Kongresu KHUNTO nian la vale ona tanba deside fó apoia tomak ba VIII Governu Konstitusionál. Ami la hirus sira,” dehan Xanana Gusmão.

Partidu neen (6) kompostu hosi CNRT, KHUNTO, PD, UDT, FM no PUDD asina akta koligasaun iha loron sábadu, 22 fevereiru 2020, iha sede CNRT, Bairro dos Grilhos, Dili.

Akta ne’e asina hosi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta, dos Santos, Prezidente En-Ezersísiu UDT, Rodolfo Aparício Guterres, Prezidente En-Ezersísiu Frente-Mudansa (FM), Egídio de Jesus no Prezidente PUDD, António de Sá Benevides.

Maibé partidu hirak ne’e, KHUNTO deside retira hosi koligasaun Aliansa Maioria Parlamentár (AMP) ne’e iha loron-kuarta, 29 abríl 2020.

Notísia Relevante: KHUNTO Deklara Retira Hosi Koligasaun Foun

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here