Primeiru-Ministru, Taur Matan Ruak. Imajen Tatoli/António Gonçalves

DILI, 30 abril 2020 (TATOLI)—Primeiru Ministru (PM), Taur Matan Ruak, sei aprezenta lista membru Governu foun na’in neen (6) hodi kompleta estrutura oitavu Governu Konstitusionál iha tempu badak.

“Ha’u informa ba Prezidente Repúblika katak Governu hakarak kompleta ninia membru sira iha tempu badak. Ha’u sei haruka naran hotu mai Prezidente Repúblika atu fó pose. Tanba, ami-nia Governu ne’e besik tinan rua la’o ho roda tolu de’it. Nune’e, ha’u hakarak atu kompleta tan roda ida. Lista ne’ebé sei aprezenta, sei prenxe de’it vaga sira ne’ebé uluk falta,” dehan PM, Taur Matan Ruak, ba jornalista sira hafoin hala’o enkontru semanál ho Xefe Estadu, Francisco Guterres “Lú Olo”, iha Palásiu Prezidensiál, Bairru Pité, Dili, kinta ne’e.

Taur Matan Ruak fó hanoin katak uluk bainhira Governu ne’e toma pose, iha na’in sia, mak prezidente Repúblika la fó pose.

“Iha kandidatu sira ne’e, Partidu Demokrátiku (PD) iha ema na’in ida no restu ne’e mai hosi partidu FRETILIN,” Taur informa.

Entretantu, lista ne’ebé Primeiru Ministru Taur Matan Ruak sei aprezenta ba Xefe estadu mak hanesan, Ministru Antigus Kombatentes Meta Malik, Ministra Saúde Odete María Freitas Belo, Vise Ministra Turizmu Komérsiu Indústria Inácia Teixeira, Ministru Administrasaun Estatál, Faustino Cardoso, Ministru Komérsiu Indústria no Turizmu Manuel Vong no Ministru Finansas Fernando Hanjam.

“Ida ne’e mak naran sira ne’ebé mak ami sei haruka mai Prezidente Repúblika,” nia subliña.

Kona-ba membru Governu hosi Partidu CNRT, Taur hateten, nia sente kontente tanba bele serbisu hamutuk nafatin ho sira no oras ne’e daudaun politika ne’ebé uza maka Governu inkluzaun.

Taur mós responde pergunta jornalista katak bainhira membru Governu hosi Partidu CNRT hakarak rejigna aan, Taur sei la obriga.

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here