Prezidente Konsellu Imprensa, Virgílio da Silva Guterres. Imajen Tatoli/Egas Cristovão

DILI, 30 abríl 2020 (TATOLI) – Prezidente Konsellu Imprensa (KI), Virgílio da Silva Guterres, informa rezultadu levantamentu ba kazu dezentendimentu entre jornalista destakadu Rádiu Televizaun Timor-Leste, Empreza Públika (RTTL,EP), Humberto dos Santos no estudante feto na’in-rua, parte Timor-Leste Press Union (TLPU) hato’o ona ba KI.

Tanba ne’e, parte KI apresia tebes ba inisiativa ne’ebé maka halo rasik husi asosiasaun TLPU.

“Konsellu Imprensa hakarak hato’o apresizaun ba TLPU ne’ebé iha inisiativa atu ba foti dadus ka informasaun balun iha fatin akontesimentu iha fronteira tanba kolega Humberto rasik hanesan membru TLPU”, dehan Prezidente KI liuhosi konferénsia imprensa iha edifísiu KI, Kintal-Boot, kinta ne’e.

Tuir nia, parte KI mós akompaña katak alin feto na’in-rua mós halo ona sira ninia testamuña liuhosi gravasaun audiu ne’ebé maka espalla ona iha mídia sosiál.

“Tanba ne’e, husi rezultadu levantamentu pelu menus Konsellu bele klarifika iha ne’e katak buat ne’ebé maka sai iha mídia sosiál, jornalista foka bainhira alin sira ne’e ba haris fatin, ida-ne’e husi levantamentu ne’ebé mai husi fatin akontesimentu no involve kontaktu fíziku ne’e akontese iha fatin ne’ebé asesu ba kámera ne’e difísil”, Virgilio Guterres realsa.

Prezidente KI konsidera, reasaun ne’ebé Jornalista Humberto halo nu’udar aktu atu salva ninia kámara, tanba iha konteksu ida-ne’e jornalista ne’e la uza kámara bain-bain maibé uza telemóvel ne’ebé hanesan fasilidade husi instituisaun ne’ebé nia servisu.

“Nia esforsu atu salva ninia kámara maka nia rekoñese katak iha kontaktu fíziku”, nia akresenta.

Maski nune’e, nia salienta entre testamuña sira ne’e, KI nafatin respeita liberdade ida-idak ninia atu foti kazu ne’e ba meiu legál.

“Ami mos oferese ami-nian prontidaun ba mediasaun bainhira parte sira ne’e aseita atu liu husi mediasaun”, nia akresenta.

Biban ne’e, Prezidente KI husu mós komunikasaun husi parte RTTL atu fó oportunidade ba alin feto na’in-rua atu hato’o mós sira ninia opiniaun kona-ba akontesimentu ne’e.

Líder órgaun independente ne’e apela ba jornalista sira atu evita deskriminasaun ba alin feto na’in-rua liuhosi meiu rede sosiál bainhira seidauk iha informasaun klaru ba kestaun ne’e.

“Ita labele deskrimina ka la loke dalan ba ema atu akuza ema sira ne’ebé involve iha kazu ne’e, tanba ita hotu hatene katak alin na’in-rua ne’e mós hetan akuzasaun husi mídia sosiál, nune’e mós kolega Humberto. Tanba ne’e maka husu ba públiku no jornalista sira atu labele lansa informasaun oin-oin hodi alastra  dezentendimentu ne’e sai bo’ot liu tan”, nia subliña.

Sorin seluk, tuir Prezidente TLPU, Manuel Pinto, mediasaun entre jornalista no estudante na’in-rua liuhosi KI mak dalan di’ak liu.

“Seluk fali dudu ami (TLPU) atu hakbesik halo mediasaun tanba julgamentu públiku liuliu facebook hafoin notísia ne’e sai husi kanál RTTL, alin feto na’in-rua sofre psikolojikamente ne’e iha. Ita jornalista ne’e serbisu ba públiku no sira ne’e estudante reprezenta públiku mós”, nia dehan.

Tuir ezekutivu TLPU ne’e, maski iha dezentendimentu ho membru TLPU, alin estudante sira ne’e la sai inimigu tanba bainhira problema ona ho públiku se tan maka bele fiar jornalista.

“Ba hasoru públiku, ha’u hanoin ita tenke pasiénsia oituan no buka dalan atu ita labele iha problema tanba públiku ho jornalista ne’e la haketak malu”, nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here