Portavóz Gabinete Sentru Integradu Jestaun Krize (CIGC), Sergio Lobo. Imajen/Egas Cristovao

DILI, 30 abríl 2020 (TATOLI) –Sentru Integradu Jestaun Krize (CIGC, sigla portugés) deklara katak, situasaun nasionál kazu Coronavirus ka COVID-19 ba loron ohin nian, kinta (30/04/2020), hatudu, rezultadu pasiente rekuperadu ka kuradu 16 (horiseik na’in-neen).

Notísia Relevante : COVID-19, Kazu Konfirmadu 24 La iha Mudansa 

Liuhosi konferénsia imprensa iha Sentru Mídia Sala Situasaun CIGC iha Sentru Konvensaun Dili (CCD), portavós CIGC  informa katak, númeru kazu konfirmadu kontinua mantein 24 (la iha mudansa ho horiseik), númeru kazu baixa 12, hein rezultadu 193, númeru kumulativu kazu negativu 435 no kazu konfirmadu foun la iha (0).

Kona-ba abitante ne’ebé kontinua kumpre konfinamentu obrigatóriu 328; iha Dili 263 no iha munisípiu sira 65. Dadus auto kuarentena na’in-46; iha Dili  na’in-ualu (8) no iha munisípiu sira na’in-38.

“Abitante sira ne’ebé sai ona hosi kuarentena obrigatóriu na’in-1.775; iha Dili 1.423 no iha munisípiu 352,” informa Sergio Lobo, koordenadór Forsa-Tarefa  Prevensaun no Metigasaun Surtu COVID-19 nu’udar mós Portavós Sala Situasaun CIGC.

“Ha’u hakarak klarifika uitoan kona-ba dezinfesaun ne’ebé maluk barak halo ba karreta, halo iha li’ur, até balu halo tan ba ema. Atu dehan lolas, dezinfesaun ne’e importante bainhira hala’o ba sasán sira hale’u pasiente no iha pasiente nia kuartu laran no sasá sira iha fasilidade saúde tanba ho dezinfesaun ne’e ita minimiza risku transmisaun liuhosi kontaktu,” klairifka Sergio Lobo.

Nia aprofunda tan katak, maibé, to’o agora seidauk iha evidénsia sufisiente atu komprova efetividade  dezinfesaun fatin públiku ne’ebé la’ós fasilidade hanesan dalan atu evita diseminasaun COVID-19.

“Ita tenke hatene katak dezinfetante sira-ne’e produtu kímiku ne’ebé tóksiku ne’ebé labele uza ba ema nia isin-lolon no tenke hadook hosi ambiente. Tan ne’e, karik uza duni, presiza tetu didi’ak vantajen no dezvantajen,” esplika Sergio Lobo.

Sergio Lobo informa mós katak, to’o agora seidauk iha entidade kompetente ida, Ministériu Saúde ka Organizasaun Mundiál Saúde (OMS), ne’ebé rekomenda atu uza dezinfetante iha fatin públiku ne’ebé la’ós fasilidade saúde.

Ministériu Saúde ho OMS la rekomenda tanba pratika uza dezinfetante ho spray ka pulverizasaun bele hamosu toksisidade ambientál tanba produsaun rai-rahun ho aerosol. Ne’e duni, evita uza dezinfetante spray iha fatin sira ne’ebé la’ós fasilidade saúde. Tamba alein de la efetivu atu prevene COVID-19, nia bele hamosu problema relasiona ho toksisidade.

Jornalista   : Nelson de Sousa

Editór           : Francisco Simões

HAKEREK NO HATÁN

Please enter your comment!
Please enter your name here