ONG Catalpa ho UNDP apoiu Ekipamentu Prevensaun COVID-19 ba Ministeriu Saude.Imajen/TATOLI.

DILI, 30 abríl 2020 (TATOLI) – Programa Nasaun Unida ba Dezenvolvimentu (UNDP-sigla inglés), Catalpa Internasionál, Simile, ho Dili International School (DIS), ohin entrega ekipamentu protesaun pesoál (PPE-sigla inglés) hodi prevene surtu COVID-19 hanesan face shield hamutuk pakote 120 ba Ministériu Saúde.

Diretóra Jerál Prestasaun Saúde, Odete Viegas da Silva, hateten programa ne’e hetan kooperasaun entre Catalpa Internasionál, UNDP. Maibé fundu orsamentu maihosi Embaixada Austrália iha Timor-Leste.

”Ida ne’e hanesan komplementu ida atu uza ba iha PPE (Personal Protection Equipment) no hanesan ita uza PPE hodi kompleta liután ita atu taka oin ho face shield ne’e’,’ tenik atuál Portavós CIGC ba jornalista sira iha Palasiu Sinzas Kaikoli, durante serimonia simu ekipamentu.

Ekipamentu hirak ne’e sei distribui ba ekipa médiku no pesoál sira ne’ebé maka servisu iha liña frente hodi prevene no mitiga Coronavirus.

Iha okaziaun ne’e, Diretóra Jerál Prestasaun Saúde hodi governu nia naran agradese ba apoiu hosi UNDP, Embaixadór Austrália iha Timor-Leste no Catalpa Internasionál.

”Tanba ne’e mak ha’u agardese ba UNDP no mós Embaixadór Austrália iha Timor-Leste no mós Catalpa karik sira atu apoiu ita semana semana, entaun ita bele fó ona ba ita-nia ema sira ne’ebé mak iha liña frente hanesan pesoál saúde no mós ekipa de trabalho iha fronteira para sira uza banhira suspeitu ruma tama ka ema ruma ne’ebé mak mai husi nasaun afetadu ka sira atu ba foti amostra servisu sira ne’e ita bele uza no hanesan maneira ida atu taka hotu oin para seguru liu tan,” realsa liután.

Iha fatin hanesan Embaixador Australia iha Timor Leste, Peter Llewilyn Roberts, informa espera ho apoiu ne’e sei tulun governu hodi kombate moras COVID-19 iha rai-laran.

“Ami halo ida ne’e iha grupu barak inklui UNDP, Catalpa, no Internasionál School para ajuda Ministériu Saúde, liliu sira ne’ebé mak iha liña frente atu proteje sira nia-an”, nia esplika.

UNDP, Catalpa Internasionál hamutuk ho parseiru sira hanesan Eskola Internasionál iha Dili (International School) no Simile, realiza serimonia entrega ekipamentu ne’e ba MS.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here