Konseleiru Superiór Partidu Kmanek Haburas Unidade Timor Oan (KHUNTO), José dos Santos Naimori Bucar. Imajen/Tatoli Egas Cristovao

DILI, 30 abríl 2020 (TATOLI)—Konseleiru Másimu Partidu Kmanek Haburas Unidade Nasionál Timor Oan (KHUNTO), José dos Santos ‘Naimori’ husu deskulpa ba Sekretáriu Jerál Ein-Ezersísiu CNRT atuál Adjuntu Sekretáriu Jerál CNRT, Jacinto Rigoberto, tanba Deputadu Olinda Guterres dún uza arma estadu nian ameasa Naimori.

Notísia Relevante: Jacinto Rigoberto: “Koligasaun AMP Sei Metin”

Konseleiru Másimu KHUNTO ne’e husu deskulpa ba Jacinto Rigoberto tanba iha loron 24 abril 2020, Deputada KHUNTO, Olinda Guterres, foti iha reuniaun líder bankada iha Parlamentu Nasional halo akuzasaun hasoru kuadru Partidu CNRT, Jacinto Rigoberto, katak lori kilat halo ameasa ba Konseleiru Superior Partidu KHUNTO, José dos Santos ‘Naimori’, iha ninia rezidénsia iha loron kinta-feira (23/04/2020).

Maske nune’e Naimori rekoñese iha akontesimentu ne’e hetan ema balun uza karreta ho kilat no uza arma estadu nian maibé la’ós Jacinto Rigoberto tanba kazu ne’e to’o agora seidauk deskobre sé mak komete kazu ne’e.

“Ha’u hakarak klarifika katak ema ne’e mai para karreta no hatún vidru ho kilat, oin uza ninja hotu ho kilat hodi hakilar iha-ne’e, no ha’u-nia labarik sira sai ba. Maibé la hatene ema sira-ne’e sé loos, ne’e la signifika ita dún ba maun Jacinto Rigoberto. Maun Rigoberto ami na’in-rua hanesan feto-san no uma-mane. Ha’u husu deskulpa ba maun Rigoberto ba deputada Olinda Guterres ne’ebé ko’alia sala, tanba ita komprende nia idade, durante ita-boot sira hatene nia iha parlamentu saida mak nia ko’alia. Ha’u rasik husu deskulpa ba maun Jacinto Rigoberto,” Naimori informa liuhosi konferénsia imprensa, iha sede Partidu KHUNTO, Manleuana, kinta ne’e.

Entretantu, Membru Superiór Partidu KHUNTO, Luis Roberto, mós husu deskulpa ba Jacinto Rigoberto relasiona ho Deputada Olinda Guterres nia akuzasaun ne’e.

“Ami husu deskulpa, maun Jacinto bele prosesa kazu ne’e maibé ami-nia parte husu deskulpa ba públika tanba ema ida labele dún arbiru bainhira laiha faktu. Ita husik investigasaun la’o tanba to’o agora ita hatene autór ba akontesimentu ne’e mak sé,” dehan Luis Roberto.

Iha biban ne’e, Prezidente Konsellu Jurizdisaun Partidu KHUNTO, José Edmundo Caetano subliña, deklarasaun ne’ebé Deputada Olinda Guterres, levanta iha parlamentu la’ós orientasaun hosi Xefe Bankada Partidu KHUNTO nian maibé ko’alia hanesan pesoál.

“Ba kompreensaun no kolaborasaun Partidu KHUNTO hato’o ninia deskulpa maibé profunda ba kuadru partidu polítiku CNRT nian, espesialmente ba kompañeiru Jacinto Rigoberto,” dehan José Edmundo Caetano.

Notísia Relevante: KHUNTO Sai Hosi Koligasaun Foun Tanba Hakarak Hakotu Impase Polítiku

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here