Prezidente KSTL, Almerio Vila Nova (daruak husi loos), akompaña husi Portavóz no I Vise Sekertáriu Jerál KSTL, Ana Carla, halo Konferénsia Imprensa iha Sede Bemori, Dili. Imajen Tatoli/ Florencio Miranda Ximenes

DILI, 30 abríl 2020 (TATOLI) – Kada tinan iha loron 1 maiu, nasaun hotu selebra Loron Mundiál Traballadór, nune’e Konfederasaun Sindikatu Traballadór Timor-Leste (KSTL), ne’ebé hanesan sumbriña ba traballadór sira, husu ba Governu no empregadór sira atu garante protesaun direitu traballadór timor-oan sira nian.

Portavóz no I Vise Sekretária Jerál KSTL, Ana Carla, deklara loron 1 maiu nu’udar loron ne’ebé importante ba klase traballadór sira iha mundu no iha Timor-Leste hodi manifesta no hato’o sira nia ezijénsia ba Governu kona-ba empregu, bem estar no protesaun ba direitu iha relasaun industriál.

Portavóz ne’e dehan, tuir KSTL nia observasaun, iha situasaun ohin loron traballadór sira ho sira ninia família iha fatin hotu iha Timor Leste infrenta problema COVID-19 no ninia impaktu ba servisu fatin.

“Ita-nia traballadór sira kontinua infrenta problema no dezafíu hanesan lakon sira-nia saláriu ka rendimentu mensál nian, lakon sira-nia servisu, redús sira-nia osan la ho razaun, hetan diskriminasaun oin-oin iha servisu fatin, servisu ho risku sein iha ekipamentu protesaun , laiha seguransa servisu, kontratadu no seluk-seluk tan. Nune’e traballadór sira sempre sai vítima ba bebeik”, tenik Ana Carla liuhosi Konferénsia Imprensa iha sede KSTL, Bemori, Dili, kinta ne’e.

I Vise Sekrétária Jerál KSTL ne’e adianta, durante tinan-tolu nia laran, povu hasoru situasaun difísil tebes tanba iha situasaun impase polítika no kontinua kedan pandemia globál ne’ebé afeta mós iha Timor-Leste.

Ba situasaun krize ne’e, Ana Carla husu Governu persiza responde ho polítika ne’ebé lais no koordenadu hodi responde situasaun sosiál, ekonomia ho lais husi nível nasionál to’o munisípiu nune’e traballadór no povu sira bele moris ho hakmatek.

“Tempu to’o ona atu povu kna’ar na’in sira hetan duni protesaun másimu ba nia direitu sira, garante ba moris ne’ebé di’ak no ses husi risku infesaun COVID-19”, katak Portavóz ne’e.

Ho nune’e, nia salienta, liuhosi oportunidade selebrasaun Loron Mundiál Traballadór tinan 2020, KSTL nu’udar organizasaun sumbriña ba traballadór sira hakarak hato’o pontu hirak hanesan:

1. KSTL hato’o apresiasaun ba Governu no dezempeñu husi ekipa Sentru Integradu Jestaun Krize (CIGC, sigla portugés), ba pesoál saúde sira, FALINTIL-Forsa Defeza Timor-Leste (F-FDTL), Polísia, traballadór limpeza no jornalista sira iha liña frente. Ho nune’e, KSTL husu fó subsídiu estraordináriu tanba sira-nia esforsu tomak hodi salva povu no nasaun husi risku surtu COVID-19.

2. KSTL husu ba empregadór sira iha Timor-Leste atu labele hapara kontratu servisu ba traballadór sira ho razaun saida de’it durante krize pandemia COVID-19 no Estadu Emerjénsia.

KSTL husu ba Governu atu foti medida ho sansaun forte ba empregadór ne’ebé hapara traballadór. Empregadór sira tenke implementa distánsia sosiál (uja shift karik iha traballadór barak), prepara luvas, máskara no hand sanitizer ba traballadór sira ho gratuitu.

3. KSTL husu ba empregadór ka osan na’in sira atu kontinua fó saláriu ba traballadór sira, maski traballadór sira hetan suspensaun ba kontratu tanba forsa maiór. Empregador sira atu rejistu lalais ita bo’ot sira nia trabalhadór iha sistema siguransa sosiál hodi hetan apoia sunsídiu ekonómika.

4. KSTL husu ba Governu atu aselera prosesu pagamentu subsídiu ba uma-kain no traballadór setór formál no setór informál.

Prosesu pagamentu ba subsídiu tenke sura husi fulan-marsu 2020 mai to’o fulan-maiu 2020 no husu ba Governu atu fó nafatin saláriu ba funsionáriu kontratadu administrasaun públika no profesór kontratadu sira.

5. KSTL husu ba Governu atu kontinua fó subsídiu pre-pagu eletrisidade ba uma-kain hotu iha Timor-Leste durante kontinua implementa Estadu Emerjénsia.

Husu atu kontrola nafatin ho rigorozu ba sasán folin iha merkadu no garantia kontrola ba estok ai-han.

6. KSTL husu ba Governu atu revee fali Lei númeru 12/ 2016, kona-ba regime seguransa sosiál kontributivu hodi konsidera mós kona-ba moras ne’ebé da’et ka afeita husi vírus hodi nune’e bele hetan fundu rekoperasaun.

7. KSTL husu ba Governu atu tau nafatin prioridade ba revizaun saláriu mínimu iha agenda polítika Governu nian, hodi garante nafatin traballadór sira nia liberdade tuir konstituisaun Repúblika Demokrátika Timor-Leste (RDTL).

8. KSTL husu ba traballadór Timór laran tomak atu halo tuir medida prevensaun husi Ministériu Saúde no Organizasaun Mundiál Saúde hanesan aplika distansia sosiál iha servisu fatin, fase liman bebeik, uza máskara, uza luvas, hodi nune’e bele prevene propagasaun COVID-19.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here