Prezidente Konsellu Imprensa, Virgílio da Silva Guterres. Imajen Tatoli/Egas Cristovão

DILI, 30 abríl 2020 (TATOLI) – Relasiona ho komemorasaun Loron Mundiál Liberdade Imprensa iha loron 3 maiu, Prezidente Konsellu Imprensa (KI), Virgilio da Silva Guterres, husu ba  Jornalista Timor-Leste atu nafatin kaer prinsípiu kódigu étika jornalista nune’e bele hadi’a liberdade imprensa iha Timór tuir klasifikasaun mundiál atubele iha mudansa.

Nune’e, líder órgaun independente ne’e apela ba jornalista husi institusaun mídia sira kuandu iha dezentendimentu labele uza violénsia atu rezolve no jornalista ho sé de’it maka besik tenke komunika ho liafuan, la presiza uza violénsia atu rezolve.

“Ita apresia ita-nia jornalizmu Timór iha mundu ba tinan ne’e tanba índise ba liberdade imprensa mundiál halo saltu bo’ot ida tan, se tinan kotuk ita iha pozisaun 84, tinan ida ne’e ita sa’e ba 70 iha lista índise liberdade imprensa. Tanba ne’e, ita tenke mantein atu kontinua garantia ba públiku informasaun di’ak liu hodi públiku bele tau konfiansa hodi hetan informasaun klaru no kualidade husi sira-nia meiu komunikasaun sosiál iha rai-laran”, dehan Prezidente KI liuhosi konferénsia imprensa iha edifísiu KI, Kintal-Boot, kinta ne’e.

Tuir Virgílio, jornalista nia kna’ar maka defende faktu iha situasaun saida de’it.

“Iha diskusaun barak ha’u hateten ba kolega jornalista sira katak jornalizmu ba jornalista sira  maka lia loos, tanba ne’e jornalista tenke defende faktu no faktu iha situasaun ida ne’e maka ansiedade públiku hanesan pániku, entaun ita-nia kontribuisaun atu redús tauk no pániku ne’e”, dehan Prezidente KI.

Biban ne’e, nia parte husu mós ba jornalista sira atu kombate informasaun falsu iha situasaun surtu COVID-19.

“Husu ba kolega jornalista sira atu bainhira halo kobertura iha períodu kombate COVID-19, ita tenke hamutuk kombate buat ne’ebé Organizasaun Mundiál Saúde temi dehan infodemia”, nia akresenta.

Nia haktuir, kada tinan KI nia apela ba jornalista sira tenke kaer nafatin kódigu étika jornalista, liu-liu iha situasaun agora iha períodu surtu COVID-19 ne’ebé la’ós de’it akontese iha Timor-Leste maibé iha mundu tomak.

“Iha instituisaun mídia tomak asosiasaun jornalista no konfederasaun jornalista mós halo diskusaun atu orienta ba padraun étiku nian”, nia akresenta.

Virgílio subliña, ba jornalista sira KI prodús ona regulamentu ne’ebé ko’alia kona-ba manuál atu utiliza konta mídia sosiál ho di’ak no evita hato’o opiniaun ne’ebé iha tendénsia atu julga ema bainhira seidauk hatene klaru kona-ba kazu ida.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here