Presidente Konfederasaun Sindikatu Timor-Leste (KSTL), Almerio Vila Nova. Imajen Tatoli/Jogerjo

DILI, 30 abríl 2020 (TATOLI) – Tuir dadus husi Konfederasaun Sindikatu Traballadór Timor-leste (KSTL), hahú husi implementasaun Estadu Emerjénsia simu ona keixa husi traballadór ne’ebé hetan suspensaun husi kompañia nasionál no internsionál hamutuk 82.

Prezidente KSTL, Almerio Vila Nova, informa keixa ne’e mai husi membru KSTL ne’ebé mai husi filiadu sindikatu hitu ne’ebé hamutuk membru 13.000.

“Problema ka keixa ne’ebé KSTL simu durante Estadu Emerjénsia ba prevensaun propagasaun COVID-19 hamutuk kazu 82, hahú kedan husi fulan-marsu to’o abríl ida ne’e”, tenik Prezidente KSTL liuhosi Konferénsia Impresa iha Sede KSTL, Bemori, kinta ne’e.

Husi totál Kazu 82 ne’e, Dirijente KSTL ne’e adianta kazu barak liu mak traballadór sira hetan suspensaun hodi hakmatek iha uma husi empregadór, maibé la simu saláriu mensál no empregadór balun hapara kedan traballadór sira husi servisu iha períodu Estadu Emerjénsia.

“Ami rejistu hotu kazu sira ne’e no ami komunika ona ho Governu atubele foti sansaun ne’ebé forte”, nia akresenta.

Kazu ne’ebé KSTL rejistu sai prioridade atu iha tempu oin mai bainhira iha rekuperasaun ba pandemia globál ne’e sei ejize atu empregadór sira tenke tuir lei no direitu ne’ebé vigora iha lei traballu.

Kazu hirak ne’e komete husi emprezáriu lokál, nasionál no balun emprezáriu internasionál inklui balun husi setór Otelaria no Turizmu, konstrusaun no super-merkadu sira.

“Kazu sira ne’e ami la hato’o ba Sekretaria Estadu ba Formasaun Profesionál (SEFOPE), tanba sindikatu mós hetan mandatu husi ita-nia lei traballu sira hodi fó kompeténsia atu reprezenta traballadór sira kualkér disputa laborál hodi tun direita ba empregadór sira atu buka dalan no fó solusaun ba kazu 82, maibé hein to’o pandemia globál ne’e termina”, nia dehan tan.

KSTL nia posizaun sei la tolera ba kuálker razaun saida de’it mak empregadór uza hodi determina traballadór sira iha situasaun COVID-19 no kontinua husu ba empregadór sira atu halo rejistu ba traballadór formál no informál iha seguransa sosiál.

Aliende ne’e, nia dehan KSTL kontinua loke-an hodi simu keixa saida de’it husi traballadór sira liuhosi mekanizmu liña hotline no média sosiál hanesan WhatsApp no Mensenger.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here