Prezidente Konsellu Imprensa (KI), Virgílio da Silva Guterres, akompaña husi membru KI, halo konferénsia imprensa kona-ba disponibilidade KI atu halo mediasaun ba kazu Jornalista Humberto no Alin Feto na’in-rua, kinta (30/04). Imajen/Mídia KI

DILI, 30 abríl 2020 (TATOLI) – Prezidente Konsellu Imprensa (KI), Virgílio da Silva Guterres, informa katak parte KI disponível sai mediadór ba kazu dizentendimentu entre jornalista destakadu Rádiu Televizaun Timo-Leste, Empreza Públika (RTTL,EP), Humberto dos Santos no estudante feto na’in-rua iha kuarentena Mota-Ain iha loron 23 abríl.

Tuir Prezidente KI, mandatu órgaun independente ne’e maka fasilita mediasaun, karik parte rua ne’e uza mediasaun atu rezolve dezentendimentu ne’ebé mosu entre sira.

“Ami iha ne’e atu halo mediasaun, tanba ami bazeia ba realidade rua, ida informasaun katak família husi alin feto na’in-rua halo ona aprosimasaun atu buka solusaun, no ida tan relatóriu ka levantamentu husi Timor Leste Press Union (TLPU) ne’ebé halo iha fatin akontesimentu, fó informasaun ne’ebé bele dehan komprensivu maibé tanba dehan ne’e husi TLPU nia, KI uza hanesan referénsia maibé KI sei buka informasaun husi parte seluk”, dehan Virgilio Guterres liuhosi konferénsia imprensa iha edifísiu KI, Kintal-Boot, kinta ne’e.

Maski nune’e, Prezidente KI rekoñese parte KI seidauk halo aprosimasaun ba alin feto na’in-rua no mós sira ninia família rasik.

“To’o agora ami seidauk halo aprosimasaun ba alin feto sira, maibé ami disponibiliza ami-nian prontidaun atu halo mediasaun no ami mós bele hahú halo komunikasaun ho família alin feto na’in-rua no mós kolega Humberto atu rona husi sira”, nia akresenta.

Virgílio subliña, KI sei la ba obriga parte rua tenke halo mediasaun.

“Portantu ami sei husu sira-nia opiniaun entre prosesu legál ho prosesu mediasaun ninian. Bainhira sira aseita opsaun ida ka bele buat rua ne’e la’o hotu katak prosesu legál tanba krime ho ida ne’e bele ba dalan justisa”, nia salienta.

Nia realsa liután katak mediasaun bele ajuda atu redús dezentendimentu sira ne’ebé maka mosu iha públiku, tanba dezentendimentu ne’e dala ruma mosu oituan dei’t maibé tanba reasaun públiku nian maka halo dezentendimentu ne’e sai bo’ot.

Parte KI mós informadu katak família husi alin feto na’in-rua mós iha tentativa hotu atu buka solusaun ba akontesimentu ne’e to’o hetan solusaun ruma ba dezentendimentu ne’ebé iha.

“Tanba ne’e KI prontu hato’o ninia disponibilidade atu parte rua hola desizaun ho rezolve ka hetan solusaun ba akontesimentu ne’e liuhosi mediasaun KI prontu atu fasilita mediasaun ida ne’e. Maibé  KI hakarak hato’o katak inisiativa ba ida ne’e tenke mai husi parte rua ne’ebé mak involve iha akontesimentu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here