KHUNTO Sai Hosi Koligasaun Foun Tanba Hakarak Hakotu Impase Polítiku

DILI, 30 abríl 2020 (TATOLI)—Konseleiru Másimu Partidu Kmanek Haburas Unidade Nasionál Timor Oan (KHUNTO), José dos Santos ‘Naimori’ hateten, Partidu KHUNTO sai hosi koligasaun foun Aliansa Maioria Parlamentár (AMP) ne’ebé ldera hosi Partidu Congresso Nacional da Reconstrução de Timor (CNRT) tanba hakarak hakotu impase polítiku.

Konseleiru Másimu Partidu KHUNTO, José dos Santos ‘Naimori’ hateten, KHUNTO mantein ho prinsípiu asegura VIII Governu Konstitusionál ne’ebé lidera hosi Primeiru-Ministru, Taur Matan Ruak.

Naimori haktuir, KHUNTO asegura VIII Governu tanba Prezidente Repúblika, Francisco Guterres ‘Lú Olo’, fó fiar ba Taur Matan Ruak lori governasaun ne’e to’o 2023.

Nia haktuir, KHUNTO a-favór ba Orsamentu Jerál Estadu iha 2019 entaun partidu hola desizaun kontinua asegura Governu ida-ne’e.

“Tanba ne’e mak ha’u hola desizaun katak KHUNTO hola desizaun sai hosi aliadu ida-ne’ebé forsa hosi maun Xanana. Ita hotu-hotu respeita maun Xanana maibé ita hotu-hotu tenke haree ba povu no labele dada nafatin impase polítiku ne’e hodi kontinua fó terus ba ita-nia povu rasik,” Naimori informa liuhosi konferénsia imprensa iha sede Partidu KHUNTO, kinta ne’e.

Naimori fó hanoin katak partidu polítiku sira halo polítika asegura povu no lori povu ne’e sai hosi nakukun ba naroman.

“Tanba ne’e mak ha’u hola desizaun di’ak liu ha’u sai hosi koligasaun. Ha’u mós sei la ba partidu seluk. Ezemplu Prezidente Repúblika dehan VIII Governu monu ona ha’u ho ha’u-nia kadeira lima (5) prontu sai opozisaun hodi hein ba eleisaun 2023. Ha’u sei la ba ho FRETILIN no ha’u sei la ba ho CNRT tanba ha’u lakohi soran partidu boot sira, líder sira hanesan maun Xanana, maun Lú Olo, maun Alkatiri, maun Alkatiri no maun Taur,” nia dehan.

Maibé nia afirma, bainhira FRETILIN fó apoia ba VIII Governu Konstitusionál entaun hanesan dalan di’ak liu nune’e bele ramata mandatu iha 2023.

Bainhira FRETILIN liuhosi deputadu sira asegura Governu iha Parlamentu Nasionál, Naimori fó parabens ba FRETILIN ne’ebé iha interese hakotu impase polítiku ne’ebé lori tempu naruk ona.

Naimori hola pozisaun sai hosi AMP tanba lakohi líder istóriku sira see kotuk ba-malu tanba líder sira-nia mehi mak ohin loron Timor-Leste ukun-an.

Niamori promete iha tempu badak sei haruka karta ida ba Tribunál Rekursu katak sai ona hosi koligasaun AMP ne’ebé lidera hosi CNRT no aliadu sira seluk.

Naimori mós lakohi fó-sai kuadru KHUNTO hira mak sei envolve iha Governu hodi viabiliza governasaun ida-ne’e.

Notísia Relevante: KHUNTO Deklara Retira Hosi Koligasaun Foun

Jornalista : Evaristo Soares Martins

Editór      : Cancio Ximenes