Imajen Tatoli/Joanico de Araújo.

DILI, 30 abril 2020 (TATOLI)–Governu liuhosi  Ministériu Saúde no Autoridade Munisípiu Dili hala’o atividade sensibilizasaun kona-ba prevensaun surtu COVID-19 hodi monta salurik (sombrelu-boot/stand) 50 ba negosiante sira ne’ebé laiha fatin atu faan iha merkadu Taibesi hodi faan sira-nia produtu iha okos.

“Ohin ita mak iha Merkadu Taibesi hodi sensibiliza informasaun kona-ba distansiamentu sosiál no distansiamentu fíziku ba negosiante sira. Ohin, ita mós fahe sombrelu-boot (salurik) hamutuk 50 ba ita-nia negosiante ka komunidade sira ne’ebé faan sira-nia produtu. Sombrelu-boot hirak ne’e, Ministériu Saùde mak oferese ba ita-nia negosiante sira,”  dehan Xefe Departamentu Jestaun Merkadória Munisípiu Dili, Berta Santa Gonçalves Vieira, ba jornalista sira iha merkadu Taibesi, Dili, kinta ne’e.

Nia hatutan, monta salurik ne’e atu negosiante sira labele faan sasán iha rai arbiru tanba ne’e Guarda Munisípiu Dili hamutuk ho Ministériu Saùde ajuda monta sombrelu-boot ba negosiante sira hodi faan ba fatin ne’ebé di’ak no saudavél.

Nia dehan, apoiu hirak ne’e ba de’it negosiante sira ne’ebé lori sira-nia produtu hosi munisípiu mak bele utiliza hodi faan.

Imajen Tatoli/Joanico de Araújo.

“Sombrelu-boot ne’e ita fó apoiu de’it ba ema sira ne’ebé tún hosi foho hanesan Hera, Lequidoe, Remexio maibé ba negosiante sira ne’ebé faan iha laran ita sei la fó tanba sira iha ona uma no meza kompletu,” nia haktuir.

Tuir nia, iha tempu badak Munisípiu Dili ho Ministériu Saùde (MS) sei monta sombrellu-boot (salurik) ba negosiante sira iha Merkadu Manleuana no Tasi Tolu.

Entretantu, Xefe Jestór merkadu Taibesi, Anibal De Jesus afirma, atividade ida ne’e realiza bele halo distánsia metru ida entre sombrelu ida ho sombrelu seluk nune’e labele hamosu ka hada’et moras ba-mai.

Nia dehan, fatin no sombrelu ne’ebé oferese hosi Ministériu Saùde ne’e atu fasilita de’it negosiante sira hodi faan maibé la’os atu deskansa iha fatin refere.

“Ita oferese ona fatin maibé hodi faan de’it maibé negosiante sira labele deskansa iha ne’e no lorokraik tuku 18:30 tenke halo mamuk ona fatin refere,” nia dehan.

Nia hateten, karik parte kompetente balu ne’ebé hanoin atu ajuda negosiante sira entaun Xefe Jertór Merkadu Taibesi agradese tebes tanba bele kontribui ona hodi fó apoiu.

Notísia Relevante: Berta Santa: “Faan Modo-Tahan iha Fatin Moos no Saudavel”

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here