Prezidente Autoridade Munisípiu Dili, Gaspar Soares, hamutuk ho MS no parseiru dezenvolvimentu hanesan UNICEF ho WFP halo sensibilizasaun prevensaun surtu COVID-19 ho surtu denge iha Merkadu Taibesi, kinta (30/04/2020). Imajen/Nelson de Sousa

DILI, 30 abríl 2020 (TATOLI)-Governu liuhosi Ministériu Saúde ekipa pilár segundu  hamutuk ho autoridade Munisípiu Dili,  ohin, hala’o sensibilizasaun kona-ba prevensaun surtu Coronavirus ka COVID-19 ho moras denge iha Merkadu Taibesi, Dili.

Governu liuhosi Ministériu Saúde ekipa pilár segundu hamutuk ho autoridade Munisípiu Dili, hala’o sensibilizasaun kona-ba prevensaun surtu Coronavirus ka COVID-19 ho surtu denge iha Merkadu Taibesi, Dili, kinta (30/04/2020).

Liuhosi sensibilizasaun ne’e, prezidente autoridade Munisípiu Dili, Gaspar Soares, halo apelu ba kompradór ho negosiante sira atu evita halibur-malu iha merkadu-laran no kumpre distansiamentu sosiál ho distansiamentu fízika.

Atividade sensibilizasaun ne’e akompaña mós Vise Koordenadór Pilar Segundu hosi Ministériu Saúde Ivo da Conceição Freitas, Xefe Guarda Jestaun Merkadu, Berta Santos no parseiru dezenvolvimentu sira hanesan Word Food Program (WFP), UNICEF no seluk-tan.

Gaspar Soares hateten, ho sensibilizasaun  ne’e  atu bolu atensaun  ba pontu importante rua ba komunidade,  liu-liu kauza problema saúde públika ne’ebé ohin loron Timor-Leste enfrenta maka oinsá halo prevensaun ba surtu COVID-19 no surtu denge.

Nia husu ba negosiante no kompradór hotu ne’ebé tama-sai iha Merkadu Taibesi  atu halo prevensaun ba  transmisaun peste letál COVID-19 hodi banati tuir  regra ba medida prevensaun sira hosi Ministériu Saúde  no Organizasaun Mundiál Saúde (OMS), maka hanesan mantén distánsia sosiál, labele halibur malu ema barak  no distánsia fíziku.

“Husu komunidade hotu atu  aplika no halo tuir medida sira ne’e, tanba moras saúde públiku ne’e presiza ema hotu kontribui halo prevensaun,” afirma Gaspar Soares.

Nia halo apelu ba pesoál Serbisu   Jestór Merkadu  Taibesi, atu orienta nafatin ba kompradór  no negosiante sira  ne’ebé tama sai atu kumpre regra sira ne’ebé iha hodi halo prevensaun.

Diresaun  Nasionál Saneamentu  no Água (DNSA) mós daudaun ne’e monta ona tanke  (profile)  hodi fasilita movimentu ema nian tama sai  atu fase-liman ho sabaun.

Oportunidade ne’e, Ministériu Saúde no parseiru dezenvolvimentu WFP ho UNICEF apoiu mós  (sombrelu-boot/stand)  ka  monta salurik   50  ba negosiante sira ne’ebé laiha fatin atu fa’an  produtu lokál  iha Merkadu Taibesi hodi  mantén distánsia fíziku.

Vise Koordenadór Pilar Segundu hosi Ministériu Saúde, Ivo da Conceição Freitas, esplika,  atividade sensibilizasaun ne’e nu’udar parte ida importante tebes hodi hasa’e konsiénsia ema hotu nian liu-liu iha fatin ne’ebé  movimentasaun ema nian rame hanesan merkadu no supermerkadu sira  hodi halo  prevensaun  no hadook-an hosi  propagasaun COVID-19.

Ministériu Saúde  serbisu hamutuk ho autoridade munisípiu sira ba oin kontinua ba  halo sensibilizasaun to’o mós ba munisípiu sira seluk hodi prevene propagasaun surtu COVID-19 ho surtu denge.

Jornalista         : Nelson de Sousa

Editór                : Francisco Simões

 

HAKEREK NO HATÁN

Please enter your comment!
Please enter your name here