Prezidente Autoridade Munisípiu Baucau, António Augusto Guterres. Imajen Tatoli/Osória Marques.

DILI, 30 abril 2020 (TATOLI)–Sentru Integradu Jestaun Krize (CIGC, sigla portúges) liuhosi Koordenadór Estadu Maiór no Koordenadòr Forsa Tarefas ba Destakamentu Reasaun Rápida no Koordenadòr Ofisiál Ligasaun, ohin, hala’o enkontru ho Prezidente Autoridade Munisípiu 12 hodi ko’alia kona-ba asuntu orientasaun jerál ba prosesu mitigasaun no intervensaun serbisu sira iha fulan ida tuir mai.

Iha enkontru ne’ebé ko’alia kona-ba “Kuarentena, Izolamentu no Mortu (mate) Nian” ne’e, Prezidente Autoridade Munisípiu Baucau, António Augusto Guterres, hato’o agradese ba ekipa Sentru Intergradu Jestaun Krize (CIGC-sigla portugés) hodi relata atividade serbisu kona-ba levantamentu no prevensaun COVID-19 iha Munisipiu Baucau ba Governu liuhosi Sentru Integradu Jestaun Krize.

“Neste momentu ita identifika daudauk rekursu ne’ebé iha terenu disponibiliza aset Estadu balun, husi ekipa infraestrutura ninian ne’ebé halo levantamentu iha sábadu-domingu depois mak desloka ba Lautem no Viqueque. Ko’alia kona-ba halo promosaun ba mitigasaun no prevensaun COVID-19 nian, iha Baucau ekipa ne’e estabelese kedas iha loron 25 marsu maski momentu ne’e sei hasoru difikuldade oin-oin,” dehan António Augusto Guterres ba jornalista sira iha Sentru Konvensaun Dili (CCD-sigla portugés), Merkadu Lama, Dili, kinta ne’e.

Nia informa, difikuldade sira ne’ebé sira enfrenta mak karreta multifunsaun duni tanba loron-loron ekipa iha hela Sentru Informasaun Intergradu hodi halo atendementu ba moras COVID-19 atu da’et ba sé no ekipa mós la koñese ema no iha biban hanesan ekipa atende ba moras baibain sira no situasaun sira seluk.

Nia hatutan, iha terrenu sira-nia ekipa mós enfrenta difikuldade ba mina no manutensaun sira durante fulan ida ona no agora Esatdu estende tan Estadu Emerjénsia ba to’o fulan maiu nian ne’e susar liután

“Se estensaun la’o to’o maiu no fulan ida tan mak ami sei la’o to’o aldeia no suku sira. Saida mak ami sente bainhira la’o to’o iha ne’ebá. Ita mós eziste hanesan autoridade ida iha Munisípiu Reprezenta hanesan Governu sentrál enfrenta iha fulan abril
komesa iha item balun ne’ebé redús. Purezemplu hanesan manutensaun viatura Estadu nian tún Ba pursentu 50,” nia informa.

Tanba, nia hateten, Sala Intergradu Jestaun Krize mós ohin iha enkontru laran hatete katak kada institusaun Governu tenke ida-idak hala’o nia knaar tanba sei iha avaliasaun ba monitorizasaun andamentu Estadu Emerjénsia ne’ebé la’o tiha ona.

“Entaun ba ha’u asegura kualker desizaun ne’ebé Estadu foti maibé ita mós tetu halo avaliasaun ba monitorizasaun andamentu Estadu Emerjénsia ne’ebé la’o tiha ona ne’ebé ninia implikasaun pozitivu no negativu hola konsiderasaun responde ba estensaun Estadu Emerjénsia iha fulan maiu ida ne’e,” nia relata.

Nia haktuir, daudaun ne’e ekipa lima (5) ne’ebé estabelese iha Baucau ne’e sólidu tebes maibé falta mak ekipamentu. Maibé sosiedade Baucau hanesan sosiedade ida ne’ebé nia protidaun boot tebes hodi fó apoiu entermus ekipamentu dezinfetante ninian no mós lojístiku alimentasun.

Nia esplika, ekipa rua mak permanente hela mak ekipa sentru informasaun integradu nian no ekipa vijilansia ne’ebé mak daudaun halo iha Triloka Baucau hodi hala’o serbisu durante iha oras 24 nia laran.

Ekipa ida seluk, nia haktuir, mak ekipa promosaun prevensaun ba mitigasaun ninian ne’ebé loron-loron la’o hela hamutuk ho Prezidente Autoridade Munisípiu, Ekipa Saùde, Bombeiru, Protesaun Sivíl no seguransa Sivíl no mós estudante voluntáriu sira hodi halo sensibilizaun ba prevensaun surtu COVID-19 ba komunidade sira.

Nia relata, agora pontu kritiku liu mak ohin nia hato’o ba Governu sentrál liuhusi CIGC iha Sala Situasaun ida ne’e katak fronteira terrestre, portu, no aeroportu taka maibé fronteira tasi husik nakloke luan ne’e bele deskonfia afeta ba transmisaun lokál.

“Iha fulan abril ró-ahi rua tenta sadere hela ba rai-maran maibé ekipa konjunta entre PNTL ho Forsa ne’ebé duni hosi tasi Wataboo Baucau nian maibé lakonsege sai mai no sira husik hela buat ruma iha ne’ebá, fila an tiha ba tasi klaran. Entaun, ita konsidera katak ita bele taka fronteira, portu no aeroportu maibé nia tenta husik ema balun atu infiltra transmite lokál Iha Baucau bele nakfera. Ho ida ne’e mak ami preokupa no hato’o ona iha sala situasaun no hein katak na’in ulun sira hola medida ruma ba kestaun ne’e,” nia dehan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here