Inan feto na'in-rua tuur hein hela sira-nia modo ne'ebé fa'an iha estrada ibun area Comoro, Dili. Imajen/TATOLI

DILI, 30 abríl 2020 (TATOLI) –Sentru Integradu Jestaun Krize (CIGC, sigla portugés), kontinua halo apelu ba populasaun tomak atu fiar nafatin governu ne’ebé  agora lidera prosesu prevensaun no metigasaun surtu Coronavirus ka COVID-19.

Notísia Relevante : Pasiente COVID-19 Na’in-16 Rekuperadu

Portavóz CIGC, Sergio Lobo. Imajen/TATOLI.

Liuhosi konferénsia imprensa, ohin, iha Sentru Mídia Sala Situasaun CIGC iha Sentru Konvensaun Dili (CCD), koordenadór Forsa-Tarefa  Prevensaun no Metigasaun Surtu COVID-19 nu’udar mós Portavós Sala Situasaun CIGC, Sergio Lobo, husu populasaun rona no fiar de’it informasaun sira  ne’ebé sai hosi Konferénsia Imprensa ne’ebé Sala Situasaun CIGC  realiza  loron-loron.

“Husu atu populasaun kolabora no partisipa no fó hanoin malu atu kumpre regra distansiamentu sosiál, distansiamentu fíziku,” hateten Sergio Lobo.

CIGC mós husu ba populasaun atu tur hakmatek iha uma, evita halibur malu, pratika ijiene pesoál, liu-liu  fase liman beibeik, liman labele kona-ba inus, matan ho ibun bainhira seidauk fase, uza máskara bainhira sai hosi uma, para fuma no hemu atu labele estraga imunidade fízika.

CIGC mós husu atu populasaun han ai-han saudavel no hala’o atividade fízika atu hasae no mantein imunidade fízika ne’ebé di’ak.

“COVID-2019  ne’e perigozu tebes, maibé ho imunidade di’ak, prátika ijiene pesoál di’ak, hela hakmatek iha uma, mantein distansiamentu sosiál, ita bele kombate no halakon surtu COVID-19 hosi ita-nia isin no ita-nia komunidade,” afirma Sergio Lobo.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here