Komandante PNTL Munisípiu Dili, Superintendente Xefe ARmando Monteiro, intrega sertifikadu ba abitante sira ne'ebé re-interga ba família hafoin kumpre ona kuarentena obrigatoriu loron 14 iha Kuarentena Tasi-Tolu ho Otél Faról, Dili, kinta (30/04/2020). Imajen/TATOLI

DILI, 30 abríl 2020 (TATOLI) – Sentru Integradu Jestaun Krize (CIGC-sigla portugés), ohin, re-integra hikas abitante na’in-59  ba ida-idak nia família tanba  kumpre ona kuarentena obrigatóriu loron-14 iha fatin Kuarentena Tasi-Tolu ho Otél Faról, Dili.

Abitante sira ne’ebé kumpre ona kuarentena obrigatóriu iha fatin Kuarentena Tasi-Tolu, kinta (30/04/2020). Imajen/TATOLI

Diretór Nasionál Polítika no Kooperasaun hosi Ministériu Saúde, Narciso Fernandes hateten, hosi númeru ne’e iha feto na’in-27 no mane 32 ne’ebé mai hosi Kuarentena Tasi-Tolu ema na’in-54 no Otél Faról na’in-lima (5).

Abitante 56 maioria estudante mai hosi nasaun afetadu propagasaun Coronavirus ka COVID-19 no na’in-tolu maka pesoál saúde ne’ebé antes ne’e halo atendimentu ba abitante sira iha kuarentena no kumpre mós kuarentena.

Nia hateten, abitante sira submete ba kuarentena obrigatóriu hosi loron 12 fulan marsu hodi hela iha Otél Katuas no Fortuna hafoin transfere fali ba iha Tasi-Tolu.

“To’o ohin kondisaun saúde abitante na’in-56 ne’e nian laiha sintoma no livre hosi COVID-19, nune’e sira bele fila-fali ba ida-idak nia família,” hateten Narciso Fernandes ba jornalista sira.

Nia husu ba abitante sira ne’ebé re-integra ona ba komunidade hafoin kumpre kuarentena obrigatóriu atu bele habelar informasaun no mensajen xave ba komunidade atu kontribui ba kombate propagasaun COVID-19.

Nia mós dehan, bainhira fila hosi kuarentena karik dezenvolve sintoma ruma ba COVID-19 atu komunika ho parte ekipa epidemolojia Ministériu Saúde hodi bele hetan asisténsia médiku.

Iha serimónia re-integrasaun ne’e, Ministériu Saúde entrega mós sertifikadu ba iha abitante atu hatudu katak, sira livre hosi COVID-19 hafoin kumpre kuarentena obrigatóriu.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here