Imajen Tatoli/Osória Marques.

DILI, 29 abril 2020 (TATOLI)–Reprezentante United Nations Children’s Emergency Fund (UNICEF) iha Timor-Leste, Valeria Taton hateten, UNICEF hamutuk ho Governu liuhosi Ministériu Solidaridade Sosiál no Inkluzasaun no Governu Japaun entrega  ekipamentu protesaun COVID-19 ba orfonatu Dominikanu iha Bidau Mota Klaran.

“Ami agradese tanba oferese ona fatin ida ne’e mai ami atu ami uza no oferese buat balu ba ita maibé objetivu distribui ekipamentu ne’e ba ita-nia komunidade Dominikanu sira hodi fasilita sira iha situasaun agora. Sasán ka ekipamentu protesaun sira ne’e mak sabaun, rinso, balde, manta, toalla, esfregar (kain pel), brosura COVID-19 no seluk tan,” dehan Valeria Taton, iha nia deskursu ba serimónia entrega ekipamentu protesaun COVID-19 iha Salaun Orfonatu Dominikanu, Bidau Mota Klaran, Dili, kuarta ne’e.

Nia hatutan, karik alin orfonatu sira hatene katak la’ós alin sira de’it maibé iha mós orfonatu hamutuk 22 ne’ebé iha teritóriu Timor laran tomak ne’ebé mós sei fahe sasán hanesan tanba labarik sira mak sai vulneravel liu.

Iha biban ne’e, Valeria Taton hato’o agradese ba Governu Japaun nia suporta hodi oferese ekipamentu protesaun sira ne’e ba labarik orfonatu sira iha Orfonatu Dominikanu ne’e.

“Nune’e ami agradese tebes ba Governu Japaun nia suporta no hamutuk Ministériu Solidaridade Sosiál no Inkluzaun (MSSI) haree no hato’o komunidade sira ne’ebé nesesidade la hanesan hodi ita bele fasilita ekipamentu ba sira,” nia dehan.

Imajen Tatoli/Osória Marques.

Xefe UNICEF ne’e hateten, ho situasaun COVID-19 ne’e halo labarik sira moris iha stress nia laran tanba eskola taka maibé enkoraja nafatin labarik sira atu akompaña programa “Eskola Ba Uma” ne’ebé mak Ministériu Edukadaun Joventude no Desportu (MEJD) fó sai liuhosi kanál televizasaun no online.

Ho nune’e, nia dehan, pakote ida ne’e kompostu hosi Tablet (telefone) ne’ebé bele fasilita labarik sira hodi asesu programa “Eskola ba Uma” nian liuhosi internet.

Entretantu, Xefe Unidade Kooperasaun no Parseria Ministériu Solidaridade Sosiál no Inkluzasaun (MSSI), João Coimbra Agostinho infroma, maski situasaun defisil atu tau matan ba labarik sira ho fasilidade ne’ebé limitadu maibe Givernu liuhosi MSSI tenta nafatin atu kontinua serbisu hamutuk ho parseiru sira hodi bele fasilita ekipamentu ba labarik sira ne’ebé presiza tebes.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here