Sekretáriu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

DILI, 29 abríl 2020 (TATOLI) – Konsellu Ministru aprova ona planu sosio-ekonómiku atubele hatan ba efeitu negativu sira ne’ebé hetan husi pandemia globál COVID-19 iha ekonomia nasionál.

Planu ne’e refere ba medida estratéjika balun, inklui implementasaun sistema universál ba transferénsia osan ne’ebé sei garante rendimentu báziku kada fulan ba família hamutuk 214.000, liuhosi subsídiu maizumenus porsentu 60 husi saláriu mensál funsionáriu sira iha setór formál nian, ne’ebé rejistu ona iha rejime kontributivu seguransa sosiál.

Ekipa téknika Sekretaria Estadu Komunikasaun Sosiál (SEKOMS), hahú simu ona proposta husi mídia-na’in sira ne’ebé hakarak partisipa hodi hetan direitu ba jornalista sira hanesan traballadór.

Sekretáriu Estadu Komunikasaun Sosiál, Merício Juvinal dos Reis Akara, informa inisiativa ne’e nu’udar apoiu direitu ne’ebé tama iha planu sosio-ekonómiku.

“Hahú ami simu ona proposta husi mídia sira ne’ebé liga ba apoia direitu, tanba Governu nia polítika ida maka atu fó apoia direitu hanesan fó subsídiu ba mídia na’in sira atu mantein ita bo’ot sira (jornalista) nian saláriu. Governu sei asegura porsentu 60”, dehan Sekretáriu Estadu Akara liuhosi konferénsia imprensa ne’ebé maka hala’o iha Salaun SEKOMS, Palásiu Governu, kuarta ne’e.

Antes ne’e, governante ne’e konvoka ona enkontru ho mídia-na’in sira hodi atualiza informasaun kona-ba estímulu ekonómiku, tanba ne’e SEKOMS sei kolabora ho mídia-na’in sira hodi evita buka lukru no bele fasilita parte hotu hodi labele sente todan hasoru situasaun COVID-19.

“Parte hotu kontribui, ne’e duni husi parte Governu kontribui porsentu 60 atu asegura nafatin saláriu ba traballadór hotu, la’ós ba jornalista de’it”, nia akresenta.

Tuir Akara, jornalista nu’udar parte ki’ik ida husi polítika ne’ebé Governu hakarak implementa.

“Entaun ami deskute oituan no kompañia na’in sira konkorada no apresia, sira sei asegura direitu ita bo’ot sira (jornalista) nian”, nia salienta.

Governu sei asegura saláriu traballadór porsentu 60, enkuantu mídia-na’in sira kontribui porsentu 40 husi saláriu.

“Asegura saláriu traballadór nian, mídia-na’in tenke kontribui nafatin, hanesan parte ida husi kolaborasaun atu hakma’an traballadór sira. Ida-ne’e vale ba empreza hotu la’ós ba mídia de’it”, Akara subliña.

Kona-ba mekanizmu atu kontrolu  subsídiu ne’e rasik maka foin daudaun parte SEKOMS konvoka ona enkotru ho mídia-na’in sira katak polítika fó subsídiu ba empreza sira atu labele hasai ninia traballadór sira, inklui mídia privadu sira ne’e tama iha kategoria empregadu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here