Sekretáriu Estadu Komunikasaun Sosiál, Merício Juvinal dos Reis Akara. Imajen Tatoli/Egas Cristovão

DILI, 29 abríl 2020 (TATOLI) – Hafoin Governu aprova dekretu ezekusaun Fundu COVID-19, kada ministériu prepara proposta no submete ba Gabinete Jestaun Krize hodi asesu ba fundu ne’e, tanba ne’e Sekretaria Estadu Komunikasaun Sosiál (SEKOMS) submete ona proposta ho montante $207.000 hodi fó biban ba mídia sira kontribui ba kampaña prevensaun COVID-19.

Sekretáriu Estadu Komunikasaun Sosiál, Merício Juvinal dos Reis Akara, informa Governu liuhosi SEKOMS autoriza ona mídia sira submete proposta ba Sentru Integradu Gabinete Jestaun  Krize (CIGC, sigla portugés), atubele asesu Fundu COVID-19, ne’ebé SEKOMS prevee ona.

“Orsamentu ne’ebé maka ha’u mensiona hodi kontribui atu halo kampaña ba prevensaun COVID-19, la’ós iha Dili de’it, maibé to’o iha área rurál tanba ida ne’e nu’udar polítika ida atu asegura ita bo’ot sira hanesan mídia-na’in tenke kolabora hamutuk atuhalo ezekusaun ne’e la’o ho di’ak”, dehan Sekretáriu Estadu Akara liuhosi konferénsia imprensa iha Palásiu Governu, kuarta ne’e.

Notísia Relevante: SEKOMS Iha Ona Proposta ba Mídia Sira Halo Kampaña Prevensaun COVID-19

Governante ne’e salienta, ba mídia privadu sira ne’ebé hakarak asesu ba fundu ne’e bele hatama proposta, liuliu atu halo kampaña prevensaun ba COVID-19.

“Téknikamente bele ona simu ita bo’ot sira nia pedidu, ne’ebé ekipa tékniku sira prontu fasilita ba publikasaun liga ba COVID-19 ne’ebé mak iha Sentru Integradu Jestaun Krize rasik”, nia akresenta.

Tuir Akara, orsamentu ne’ebé SEKOMS prevee iha Gabinete Jestaun Krize hanesan orsamemtu bem servisu, ne’ebé maka mídia nasionál sira bele halo publisidade liuhosi jornál, televizaun no online.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here