Primeiru-Ministru, Taur Matan Ruak. Imajen Tatoli/Egas Cristovão

DILI, 29 abríl 2020 (TATOLI)–Ministru Negósiu Estranjeiru no Kooperasaun (MNEK), Dionísio da Costa Babo Soares, afirma Primeiru-Ministru, Taur Matan Ruak deklara ona sei la halo remodelasaun ba estrutura Governu daualu, maibé sei esforsu atu kompleta de’it kargu sira ne’ebé mamuk iha tempu badak.

“Ne’e la’ós remodelasaun ida maibé kompleta kargu sira ne’ebé mak sei mamuk kona-ba membru partidu sira ne’ebé iha Governu inklui CNRT, kabe ba ami ida-idak mak deside,” katak Dionísio ba jornalista sira, iha edifísiu Ministériu Finansa, Aitarak-laran, Dili, kuarta ne’e.

Atuál Prezidente Konsellu Diretiva Nasionál (CDN-sigla portugés) Partidu CNRT ne’e haktuir tan katak PM Taur Matan Ruak iha ona kompromisu polítika hodi kompleta estrutura Governu ne’ebé maka mamuk no sei la halo mudansa ba estrutura ne’ebé daudaun ne’e iha ona.

Estrutura Governu Konstitusionál daulau ne’ebé maka durante tinan rua resin sei mamuk hanesan kargu ba Ministériu Finansa, Ministériu Saúde, Ministériu Administrasaun Estatál, Ministériu Turizmu Komérsiu no Indústria.

“Primeiru-Ministru nakloke tebes no hateten katak hakarak mantein atuál estrutura Governu tanba nia (PM) satisfeitu tebes ho servisu ne’ebé membru CNRT sira hala’o iha períodu ida-ne’e no laiha planu ida atu halo mudansa,” tenik Babo.

Eis Ministru Administrasaun Estatál ne’e hateten sei prontu nafatin atu fó kontribuisaun ba Governu ne’ebé lideradu hosi Primeiru-Ministru, Taur Matan Ruak.

Entretantu, membru governu indijitadu ne’ebé Xefe Estadu seidauk fó pose antes ne’e mak hanesan Ministru Finansa, Helder Lopes, Ministru Turizmu Komérsiu no Indústria, Francisco Kalbuadi Lay, Ministru Kombantente no Libertasaun Nasionál, Virgílio Smith, Ministru Saúde, Sergio Lobo, Ministru Interiór (deklara rezigna-an ona), António Verdial, Vise –Ministru Justisa, Amandio Benevides, Vise-Ministru Negósiu Estranjeiru no Kooperasaun, José Turquel.

Enkuantu, Ministru Planeamentu no Investimentu Estrantéjiku, Samuel Marçal, ho Ministru Petróliuno Rekursu Minerál, Alfredo Pires, PR aseita ona atu fó pose maibé kandidatu na’in rua ne’e rejeita tanba hakarak fó solidaridade ba kandidatu membru governu na’in hitu seluk.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here