Xefe Bankada Partidu Demokrátiku (PD), António da Conceição ‘Kalohan'. Imajen TATOLI/António Gonçalves

DILI, 29 abríl 2020 (TATOLI)—Partidu Demokrátiku (PD) husu halo kampaña sensibilizasaun maka’as liután kona-ba implementasaun Estadu Emerjénsia (EE) ne’e atu povu Timor-Leste bele komprende saida mak Estadu Emerjénsia ne’e.

Xefe Bankada Parlamentár PD, António da Conçeição hateten, implementasaun EE iha Timor-Leste tanba kauza hosi surtu COVID-19 ne’ebé hamate ema barak iha mundu, liuliu iha Estadu Unidu Amérika (EUA), Itália, España, Inglaterra, Fransa, Repúblika Populár Xina, Edukadór no nasaun sira seluk.

“Ha’u hanoin ita presiza kampaña sensibilidade ida maka’as liután atu ita-nia ema sira bele kompriende saida mak estadu emerjénsia. Estadu emerjénsia ne’e mós dalaruma inkomoda ema barak mós tanba ema toman tiha ona la’o ba-mai maibé agora ne’e sulan de’it tanba moras COVID-19 ne’e perigu,” dehan António da Conçeição ba jornalista sira iha resintu Parlamentu Nasionál, kuarta ne’e.

Deputadu PD ne’e propoin, VIII Governu Konstitusionál presiza halo kampaña ida maka’as liuhosi televizaun kona-ba regra sira iha Estadu Emerjénsia ne’e.

“Agora daudaun estadu emerjénsia hela. Estadu emerjénsia ne’e rekere atu ita tenke ser hela iha ita-nia fatin, halo de’it buat ne’ebé urjente no importante,” nia dehan.

Nia esplika, ho estadu emerjénsia ne’e sidadaun sira-nia direitu, liberdade no garantia sira balun sei suspende hanesan sirkulasaun internasionál, liberdade sirkulasaun no hela iha fatin ne’ebé de’it iha territóriu nasionál.

Nune’e mós, tuir nia, suspende direitu ba reuniaun no manifestasaun, liberdadade kultu nian bainhira envolve ema barak, direitu ba rezisténsia, direitu ba propriedade no inisiativa ekonómika privada no direitu ba traballadór sira-nian.

Prezidente Repúblika dekreta ona Estadu Emerjénsia ne’e bazeia ba autorizasaun ba Parlamentu Nasionál iha loron 27 abríl 2020.

Tuir Konstituisaun RDTL artigu 85 alínea g deklara estadu sítiu nian ka estadu emerjénsia tuir Parlamentu Nasionál haruka bainhira rona tiha ona Konsellu-Estadu, Governu no Konsellu Superiór Defeza no Seguransa nian.

Xefe Estadu dekreta ona Estadu Emerjénsia ne’e bazeia artigu 85 alínea g Konstituisaun RDTL, hamutuk ho artigu 9, 10, 11, 15, no 27 hosi lei nú 3/2008, ho data 22 fevereiru (Rejime ba Estadu  Sítiu no Estadu Emerjénsia nian).

Renovasaun ba estadu emerjénsia ba territóriu nasionál tomak, durante loron 30 (tolunulu), hahú hosi 28 fulan-abríl 2020 (loron-tersa) tuku 00:00 to’o loron 26 fulan-maiu 2020 (loron-tersa) tuku 23:59.

Notísia Relevante: Prezidente Repúblika Promulga Estensaun Estadu Emerjénsia

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here