Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 29 abríl 2020 (TATOLI) – Ministru Obra Públika, Salvador Eugênio Soares dos Reis Pires, informa polítika fó subsídiu pre-pagu eletrisidade daruak ba kliente hamutuk 160.555, parte Ministériu Obra Públika (MOP) sei halo avaliasaun, hafoin simu relatóriu finál husi operadór telekomunikasaun tolu hanesan Timor-Telecom, Telemor no Telkomcel.

“Ha’u seidauk anúnsia buat ida, tanba ami seidauk simu relatóriu finál husi implementasaun subsídiu pre-pagu eletrisidade dahuluk nian husi operadór telekomunikasaun tolu ne’e. Tanba ne’e ami hein relatóriu no ami avalia lai hafoin informa filafali”, tenik Ministru Salvador iha Edífisiu Ministériu Finansa, Aitarak-Laran, kuarta ne’e.

Maski nune’e, tuir ministru ne’e iha posibilidade boot atu fó subsídiu pre-pagu ba kliente Eletricidade de Timor-Leste (EDTL) ho hanoin ida katak evita kliente sira konsentra iha fatin sosa pulsa eletrisidade, nune’e bele prevene kliente sira husi propagasaun surtu COVID-19.

“Bele iha posibilidade tanba Dekretu Governu artigu númeru 26 mantein nafatin, tanba ne’e ami bele hala’o servisu tarefa ba komunidade sira, maibé ha’u sei haree tanba ami presiza prepera lai sasán hotu no posível ona ami sei anúnsia”, nia adianta.

Kona-ba montante subsídiu pre-pagu eletrisidade ba faze daruak, governante ne’e dehan nia parte sei haree hela tanba seidauk iha desizaun ba tarefa subsídiu pre-pagu eletrisidade ba kliente hamutuk 160.555.

Subsídiu pre-pagu eletrisidade dahuluk ho montante $15 ba kada kliente, na’in-111.558 maka asesu ona husi totál kliente 160.555, ne’ebé termina ona períodu iha loron 26 abríl 2020.

Subsídiu ne’ebé hetan hanesan naun finanseiru tanba ne’e operadór telekomunikasaun manda de’it númeru token pre-pagu $15 ba kada númeru kontadór kliente.

Subsídiu pulsa eletrisidade no bee-moos ne’e ho objetivu atu evita movimentasaun komunidade nian ba hola pulsa eletrisidade no selu bee-moos iha balkaun banku, no hela iha uma mantein distánsia sosiál no evita kontaktu fíziku hodi prevene propagasaun COVID-19 iha Timor-Leste.

Meiu atu asesu subsídiu pre-pagu eletrisidade dahuluk mak hanesan hakerek EDTL #númeru kontadór manda ba númeru hotline 12150 ne’ebé bele uza sim Card Timor-Telecom, Telemor no Telecomcel.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here