Ministru Obra Públika, Salvador Eugênio Soares Dos Reis Pires. Imajen Tatoli/Florencio Miranda Ximenes

DILI, 29 abríl 2020 (TATOLI) – Ministériu Obra Públika (MOP) aprezenta ona proposta ba Sentru Integradu Jestaun Krize (CIGC,sigla portugés) atu asesu fundu COVID-19 ho montante $100.000 hodi fó subsídiu ba tékniku Eletricidade  de Timor-Leste (EDTL) no Diresaun Jerál Água no Saneamentu (DGAS, sigla Portugés).

“Ami-nia proposta ba Fundu COVID-19 hamutuk $100.000 tanba fahe ba diresaun rua hanesan EDTL ho tékniku na’in-340 no DGAS na’in-140 atu fó subsídiu”, tenik Ministru Obra Públika, Salvador Eugênio Soares dos Reis Pires, iha edifísiu Ministériu Finansa, Aitarak-Laran, kuarta ne’e.

Tuir Ministru Salvador, subsídiu ne’e nia kritériu prinsipál mak ba liña frente sira ne’ebé mak servisu no presta nafatin sira nian responsabilidade atu asegura servisu esensiál sira iha períodu Estadu Emerjénsia ba prevensaun no kombate surtu COVID-19.

Notísia Relevante: Orsamentu Millaun $150 Aloka ba Ministériu no Instituisaun Hamutuk 13 Hahú Bele Ezekuta

Nia adianta, subsídiu ba funsionáriu tékniku iha área esensiál sira aprova ona no hetan ona promulgasaun husi Prezidente Repúblika.

“Iha faze tuir mai mak diskute kona-ba tarefa kada ema ida hira. Tanba ne’e atu iha nominál hormonizadu ne’e depende ba Sekretariadu Tékniku Konsellu Jestaun Fundu COVID-19”, nia akresenta.

Ho nune’e, nia salienta ministériu hanesan benefisiáriu hodi hato’o proposta hafoin Sekretáriu Fundu COVID-19 lori fali ba diskute no aprova atubele atribui ona ba tékniku sira.

Antes ne’e, ministru ne’e deklara tékniku sira ne’e iha nível barak liu ho saláriu mínimu ne’ebé kada fulan $115, maibé sira mós aposta ba risku COVID-19.

“Kuandu água no saneamentu inklui eletrisidade hetan avaria ruma sira tenke halo atendimentu”, nia realsa.

Entretantu, orsamentu ba Fundu COVID-19 ne’ebé Parlamentu Nasionál aprova no Prezidente Repúblika promulga hamutuk millaun $150 no parte Governu mós aprova ona Dekretu-Lei ba médida ezekusaun.

Konsellu Jestaun Fundu COVID-19 deklara ona, hahú tersa (28/04) benefisiáriu sira bele ona ezekuta fundu ne’e.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here