Xefe Estadu Maior Jenerál FALINTIL-Forsa Defeza Timor-Leste, Majór Jenerál Lere Anan Timur. Imajen/Antonio Goncalves.

DILI, 29 abril 2020 (TATOLI)—Xefe Estadu Maior Jenerál FALINTIL-Forsa Defeza Timor-Leste, Majór Jenerál Lere Anan Timur informa, Komandu FALINTIL Forsa Defeza Timor Leste (F-FDTL) aumenta tan postu militár tolu iha fronteira terrestre atu fó apoiu másimu ba Polisia Nasionál Timor Leste (PNTL) liuliu Unidade Patrullamentu Fronteira (UPF), hodi halo seguransa no kontrola movimentu ilegal sidadaun sira-nian durante Estadu Emerjénsia.

“Komandu FALINTIL Forsa Defeza Timor Leste (F-FDTL) aumenta tan postu militár tolu iha fronteira terrestre atu fó apoiu másimu ba Polisia Nasionál Timor Leste (PNTL), Unidade Patrullamentu Fronteira (UPF). F-FDTL hanesan forsa ida ba seguransa esterna, entaun agora daudaun reforsa hela seguransa iha fronteira. Sira iha fronteira ne’ebá atu kontrola ‘Entrada’ no ‘Saída’ movimentu ilegal sidadaun sira-nian durante Estadu Emerjénsia,” dehan Majór Jenerál Lere Anan Timur, ba jornalista sira hafoin hala’o enkontru semanál ho Prezidente Repúblika, Francisco Guterres “Lú Olo”, iha Palásiu Prezidensiál Bairru Pité, Dili, kuarta ne’e.

Jenerál Lere Anan Timur informa, aumenta tah postu militár tolu ne’e mak iha Cova, Alto Lebos no Mota-Masin hodi hamatan ba defeza esterna ninian no apoiu PNTL liuliu UPF hodi kontrola ema tama-sai hosi territóriu nasionál.

Entretantu, postu militár molok estadu emerjénsia iha de’it Tilomar, Tunubibi no Batugede. Ho aumentu postu militár tolu (3) ne’e sei hametin liután defeza esterna iha situasaun Estadu Emerjénsia no apoiu di’ak liután PNTL hala’o nia serbisu ba prevensaun no kontrolu COVID-19.

Xefe Estadu Maior Jenerál apela ba populasaun hotu-hotu atu kontinua tuir regra ne’ebé Sentru Integradu Jestaun Krize fó-sai nu’udar dalan di’ak liu atu hasees-an hosi moras COVID-19. Instituisaun seguransa kontinua tun ba komunidade atu hotu-hotu bele tuir medida implementasaun estadu emerjénsia ninian.

“Tanba ne’e hahú kedan hosi líder sira to’o povu baibain tenke kumpre regra, ema ida labele viola. Agora daudaun Polisia Nasionál Timor Leste (PNTL) komesa la’o ona iha estrada no la’o tama sai bairru sira atu kontrola. Tanba ida ne’e hanesan inimigu ida ne’ebé hanesan ema hotu ko’alia katak ita la haree no la hili ema,” Lere apela.

Xefe Estadu Maior Jenerál husu ba foinsa’e sira atu para lansa boatus beibeik atu dezakredita Governu no lider nasionál sira tanba instituisaun seguransa sei buka tuir individu ne’ebé kontinua lansa boatus ho hanoin destabilizasaun polítika.

Notisia Relevante: F-FDTL Koloka Ona Pelotaun Tolu iha Fronteira

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here